मातृका यादवले बोलेको शब्द संसद्‍को रेकर्डबाट हटाउन सभामुखको निर्देशन

फाइल तस्‍बिर

काठमाडौँ - नेकपा माओवादी केन्‍द्रका सांसद मातृका यादवले बोलेको शब्द प्रतिनिधि सभाको रेकर्डबाट हटाउन सभामुखले निर्देशन दिएका छन् । शुक्रबारको प्रतिनिधि सभा बैठकमा नेकपा एमालेका सांसदले उठेर विरोध जनाएपछि सभामुखले यादवले बोलेको शब्द हटाउन निर्देशन दिएका हुन् ।

आजको बैठको सुरुमै एमालेले उठेर विरोध जनाएको थियो। एमालेले यादवले बोलेको असंसदीय र अमार्यादित कुरा स‌ंसद्‍को रेकर्डबाट हटाउन माग गरेको थियो । लगत्‍तै सभामुख अग्‍निप्रसाद सापकोटाले रेकर्डबाट हटाउन निर्देशन दिएका हुन् । 

बिहीबारको प्रतिनिधि सभा बैठकमा सांसद यादवले पूर्व प्रधानमन्त्री ओलीप्रति इङ्‍गित गर्दै 'मेन्टली' र 'फिजिकल्ली' पनि ठीक नभएको टिप्‍पणी गरेका थिए । वर्तमान सरकारलाई परमादेशको सरकार भनी टिप्पणी गरेको भन्दै सांसद यादवले आपत्ति जनाउँदै त्यसरी टिप्‍पणी गरेका थिए । 'मैले एउटै पार्टी हुँदा पनि स्थायी समितिको बैठकमा नै भनेको थिएँ, कमरेडहरू 'मेन्टल्ली' पनि ठीक हुनुहुन्न, 'फिजिकल्ली'  पनि ठिक हुनुहुन्न । त्यसैले कुनै बेला पनि दुर्घटना हुनसक्छ ।' 

यादवको भनाइप्रति एमालेले बिहीबारकै बैठकमा आपत्‍ति जनाएका थिए ।