माओवादीको केन्द्रीय कमिटी बैठकमा अध्यक्ष दाहालको राजनीतिक प्रतिवेदन पेश हुने

काठमाडौँ – सत्तारुढ नेकपा माओवादी केन्द्रको केन्द्रीय कमिटी बैठक शनिबारदेखि सुरु हुने भएको छ । बैठकमा पार्टी अध्यक्ष पुष्पकमल दाहालले तत्कालिक राजनीतिक र सांगठनिक प्रतिवेदन पेश गर्ने कार्यसूची रहेको छ । 

शुक्रबार पेरिसडाँडास्थित पार्टी केन्द्रीय कार्यालयमा बसेको माओवादी केन्द्रको स्थायी कमिटी बैठकले यस्तो निर्णय गरेको हो । प्रतिवेदनमा पार्टीको राजनीतिक कार्यदिशालाई स्पष्ट पार्ने, अहिले प्रतिगमनविरोधी संघर्ष र कम्युनिष्ट आन्दोलनमा देखापरेको विसर्जनवादी प्रवृत्तिविरुद्धको संघर्षलाई दृढतापूर्वक अघि बढाउन उल्लेख रहेको प्रवक्ता नारायणकाजी श्रेष्ठले बताए ।

प्रतिगमनकारी कदम असफल भए पनि प्रतिगमनप्रति सजक रहँदै संविधानको रक्षा र कार्यान्वयनका निम्ति वामशक्तिहरूबीचको सहकार्यलाई अगाडि बढाउने पनि पतिवेदनमा उल्लेख गरिएको उनले जानकारी दिए ।

‘पार्टीलाई व्यवस्थित र सदृढ बनाउँदै आवश्यक ध्रुवीकरणको विषयलाई पनि प्रतिवेदनमा सामावेश गरिएको छ । शनिबार साढे १० बजे स्थायी कमिटी बैठक बस्ने र ११ बजे केन्द्रीय कमिटी बैठक बस्ने तय भएको छ,’ उनले भने ।

शुक्रबार बसेको स्थायी कमिटीको बैठकबाट माओवादीले सरकारमा पठाउने मन्त्रीको टुंगो लगाउने सम्भावना देखिए पनि यसबारे बैठकमा केही निर्णय नभएको उनले बताए । सरकारमा माओवादीबाट सात जना मन्त्री सहभागी हुने गठबन्धन दलबीच सहमति भए पनि हालसम्म माओवादीबाट दुई जना मात्र मन्त्री बनेका छन् ।