सरकारलाई सफल बनाउने अभियानमा लाग्न दाहालको निर्देशन

काठमाडौँ - सत्तारुढ नेकपा माओवादी केन्द्रका अध्यक्ष पुष्पकमल दाहालले सरकारलाई सफल बनाउने अभियानमा केन्द्रित हुन पार्टीका नेता, कार्यकर्तालाई निर्देशन दिएका छन् । पार्टी केन्द्रीय कार्यालय पेरिसडाँडामा शुक्रबार बसेको स्थायी कमिटी बैठकमा बोल्दै उनले यस्तो निर्देशन दिएका हुन् ।

‘सरकारमा रहेको हाम्रो पार्टीलाई सुदृढ गर्न सबै नेता, कार्यकर्ताको सामूहिक भावना आवश्यक रहेको बताउँदै पार्टी र सरकारलाई नै सफल बनाउने अभियानमा लाग्न सबै कमिटीका साथीहरूलाई अध्यक्ष कमरेडले निर्देशन दिनुभएको छ,’ बैठकपछि प्रवक्ता नारायणकाजी श्रेष्ठले जानकारी दिए ।

बैठकले शनिबारबाट सुरु हुने केन्द्रीय कमिटीको बैठक सुरु गर्ने निर्णय गर्दै सो बैठकमा अध्यक्ष दाहालले राजनीतिक तथा सांगठानिक प्रतिवेदन पेश गर्ने सहमति गरेको उनले बताए । ‘शुक्रबारको बैठक पार्टीको आन्तरिक छलफल र कार्यक्रममा केन्द्रित भयो, पार्टीको तर्फबाट सरकारमा सहभागी हुने मन्त्रीका बारेमा छलफल भएन,’ प्रवक्ताा श्रेष्ठले भने ।