दाहालले माधव नेपालको ढाडमा टेकेर केपीको टाउकोमा हाने : शंकर पोखरेल

बुटवल- भर्खरै लुम्बिनी प्रदेशको मुख्यमन्त्रीबाट विदाभएका नेकपा एमालेका नेता शंकर पोखरेलले माओवादीका अध्यक्ष पुष्पकमल दाहालप्रति आक्रोश व्यक्त गरेका छन् । उनले दाहालले जनयुद्धकालीन ढाडमा टेकेर टाउकोमा हान्‍ने नीति अहिले पनि नछोडेको टिप्पणी गरे ।

आफूहरूले भरोसा गरेर चुनावी गठबन्धनसँगै पार्टी एकता गरे पनि दाहालले माधव नेपालको ढाडमा टेकेर एमाले अध्यक्ष केपी शर्मा ओलीको टाउकोमा हानेकोआरोप उनको छ ।

‘पुष्पकमल दाहाल प्रचण्डलाई आधार बनाएर हामीले चुनावी गठबन्धन गर्‍यौँ । पार्टी एकता गर्‍यौँ तर उहाँले ढाडमा टेकेर टाउकोमा हान्‍ने नीति छोड्नु भएको रैनछ' पोखरेलले  भने 'माधव नेपालको ढाडमा टेकेर केपी ओलीको टाउकोमा हान्‍ने कोसिस गर्नुभयो । आजको परणामले त्यही पुष्टि भएको छ ।'

उनले संघ र प्रदेश सरकारहरूमा अहिले देखिएको समस्या पनि दाहालकै कारण भएको बताए । दाहालमा रहेको अस्थिरता, अवसरवाद र महत्वकांक्षाको संयोजनका कारण देशमा अहिले अस्थिरता सिर्जना भएको आरोपसमेत लगाए । उनले दाहालले अहिले देउवालाई मोहरा बनाएर अस्थिरताको काम गरिरहेको टिप्पणी गरे ।