कलाकार खोज्दै प्रदीपको ‘प्रकाश’

काठमाडौं : सामान्यीकरण गर्न मिलिनहाल्ला तर अनुमान गर्न सकिन्छ अनुप बरालसँगको छोटो अभिनयको सिकाइले पनि प्रदीप  खड्कामा परिवर्तन आएको छ । हिजो जे चिजमा पनि हाबी हुने आरोप खेप्दै आएका प्रदीपले बिस्तारै आफ्नो सीमितता महसुस गर्न थालेका छन् । यसको परिणाम देखिएको छ, उनले गर्न लागेको नयाँ फिल्म ‘प्रकाश’को कास्टिङ आहवान्बाट ।

प्रदीपको मुख्य भूमिका रहने फिल्मले आइतबार मात्र कास्टिङ कल गरेको छ । फिल्मले मुख्य अभिनेता, अभिनेत्री, चरित्र अभिनेता, चरित्र अभिनेत्री, सहायक अभिनेता÷अभिनेत्री बाल कलाकार आदि गरी ९ जना कलाकार माग गरेको छ । प्रदीप संलग्न फिल्ममा यसअघि विरलै यसरी कलाकार छनोट गरिएको थियो । 
पछिल्ला दुई फिल्मले नराम्रो गाली खाएपछि प्रदीप ‘प्रेमगीत ३’को पर्खाइमा थिए ।

तर, महामारीका कारण फिल्मको प्रदर्शन अनिश्चित बनेपछि अब गर्ने फिल्ममा प्रदीपलाई आफ्नो स्टारडम जोगाउनु पर्ने चुनौती छ । यही कारण पनि प्रदीप नयाँ फिल्महरूमा सतर्क छन् । प्रदीप यो फिल्ममा जुम्लाको कुनै गाउँमा शिक्षक बन्न चाहाने युवकको भूमिकामा देखिनेछन् । फिल्मलाई दिनेश राउतले निर्देशन गर्नेछन् भने फिल्मको पटकथा विकास सुवेदीको हो ।