पेस्तोल देखाएर महिलामाथि सामूहिक बलात्कार घटना सार्वजनिक

सांकेतिक फोटो

जनकपुरधाम - हतियार देखाएर लुटपाट तथा बलात्कार गरेर फरार रहेका युवकलाई प्रहरीले पक्राउ गरेको छ । पक्राउ पर्नेमा धनुषाको कमला नगरपालिका ८ का २७ वर्षीय शम्भु महरा भन्ने शम्भु रबिदास रहेको जिल्ला प्रहरी कार्यालय धनुषाले जनाएको छ । शनिवार बेलुका उनलाई जनकपुरधाम १६ कपिलेश्वरस्थित रेल्वे लिकबाट पक्राउ गरिएको कुरा जिप्रका प्रवक्ता जितेन्द्र बस्नेतले जनाएको छ ।

गएको वर्ष भदौ ६ गतेका दिन घरबाट पानी लिन निस्किँदा सोही ठाउँकी एक महिलालाई पेस्तोल देखाएर शम्भु सहित रामचन्द्र मण्डल खत्वे समेतको समूहले गरगहना लुटपाट गर्नुका साथै पालैपालो गरी बलात्कार गरी फरार भएको थियो । 

पीडितले दिएको जाहेरीको आधारमा प्रहरीले मुद्दा दायर गरी अनुसन्धान पश्चात अदालतमा मिसिल समेत पेश गरिसकेको थियो । तर अदालतमा मुद्दा विचराधीन रहेकै अवस्थामा फरार रहेका अभियुक्तमध्ये शम्भुलाई पक्राउ गरी कारबाहीका लागि अदालतमा पेश गरिएको प्रवक्ता बस्नेतले जनाएको छ ।

उनले भने ‘पक्राउ परेका शम्भुमाथि हातहतियार, डाका र जबरजस्ती करणी मुद्दाको मिसिल अनुसार कारबाहीका लागि आइतबार जिल्ला अदालतमा पेश गरिएको र अन्य अभियुक्तहरुको खोजी कार्य जारी छ ।’