चलचित्र विकास बोर्डले माग्यो पटकथा

काठमाडौं :  चलचित्र विकास बोर्डले मौलिक तथा कलात्मक चलचित्र निर्माणका लागि भन्दै पटकथा आहवान गरेको छ । बोर्डले सोमबार पत्रिकामा सूचना प्रकाशित गर्दै इच्छुक फिल्मकर्मीबाट पटकथाको माग गरेको हो । बोर्डले यो अभियानमा सहभागी हुन चाहाने लेखकले सूचना प्रकाशित भएको २१ दिन भित्र आफ्ना कथा बुझाउनु पर्ने बताएको छ । 
बोर्डले यसरी प्रतिस्पर्धामा आएका पटकथामध्ये केहीलाई छानेर सहनिर्माण गर्ने र लेखन प्रक्रियामा पनि आवश्यकताअनुसार विशेषज्ञता उपलब्ध गराउने जनाएको छ
स्वदेशी तथा मौलिक चलचित्र निर्माणमा मद्दत पुग्ने अभिप्रायका साथ बोर्डले केही समयअघि नै स्टोरी बैंकको कार्यविधि २०७७ बनाएको छ । बोर्डका सदस्य सचिव महेन्द्रबहादुर साँखीको संयोजकत्वमा गठन भएको मस्यौदा समितिमा नवल खड्का सह–संयोजक थिए । ‘स्टाेरी बैंक’ का लागि प्राप्त भएका स्टोरी मध्येबाट छानिएका ५ मौलिक स्टोरीमा फिल्म निर्माणका लागि राज्यले विभिन्न सुविधा पाउनेछन् ।कार्यविधि अनुसार दुई फिचर फिल्म, दुई डकुमेन्ट्री र एउटा सर्ट फिल्मलाई राज्यले निर्माणमा सघाउने कार्यविधिको प्रस्ताव रहेको सदस्यले बताएका थिए ।

समितिमा विकासराज आचार्य, रविन्द्र रञ्जन झा, फुलमान वल, दीपेन्द्र के खनाल, छिरिङ रितार शेर्पा, मीनबहादुर भाम, केकी अधिकारी, ताराकुमार श्रेष्ठ र गिरीश शर्मा सदस्य रहेका थिए । विकास बोर्डले यसअघि पनि सोही पटकथा लेखन प्रतियोगिता आयोजना गरेको थियो । शम्भुजित बाँस्कोटा विकास बोर्ड अध्यक्ष भएको समयमा गरिएको यस्तै प्रकृतिको प्रतियोगिता भने नराम्ररी असफल भएको थियो । सो समयमा बोर्डले २७ वटा पटकथा पाए पनि पुरस्कारका लायक कुनै पनि पटकथा नभएको भन्दै वोर्डले यो कार्यक्रम खारेज गरेको थियो । 

हेर्नुस् बोर्डको सूचना