धनराज गुरुङको देउवालाई प्रश्‍न : सर्वदलीय बैठकको औचित्य के ? बरु मोर्चाबन्दी कस्‍न बैठक बसौं

फाइल तस्बिर

काठमाडौं : कांग्रेस नेता धनराज गुरुङले प्रधानमन्त्री केपी शर्मा ओलीले बोलाएको सर्वदलीय बैठकको औचित्य नभएको बताएका छन् । मंगलबार बिहान सामाजिक सञ्‍जाल ट्‍वीटरमा कांग्रेस सभापति शेरबहादुर देउवालाई मेन्सन गर्दै सर्वदलीय बैठकको औचित्य नभएको बताएका हुन् ।

गुरुङले आफ्नै पार्टीका नेताहरुले भ्रष्टाचारीको आरोप लगाएपछि पार्टी बैठकमा ओली उपस्थित हुन छाडेको दाबी गरेका छन् । उनले सर्वदलीय बैठक प्रमुख प्रतिपक्ष दल कांग्रेसकै नेतृत्वमा भ्रष्टाचारविरुद्ध मोर्चाबन्दी कस्‍नका लागि आवश्यक रहेको औंल्याएका छन् ।

'आफ्नै पार्टीका नेताहरुले भ्रष्टाचारीको आरोप लगाएपछि पार्टीकै बैठकमा उपस्थित हुन छाडेका प्रधानमन्त्रीले बोलाएको सर्वदलीय बैठकको औचित्य छैन' गुरुङले ट्‍वीट गरेका छन् 'बरु यतिखेर सर्वदलीय बैठक त प्रमुख प्रतिपक्ष दल कांग्रेसकै नेतृत्वमा भ्रष्टाचारविरुद्ध मोर्चाबन्दी कस्‍नका लागि आवश्यक छ ।'

आफ्नै पार्टीका नेताहरुले भ्रष्टाचारीको आरोप लगाएपछि पार्टीकै बैठकमा उपस्थित हुन छाडेका प्रधानमन्त्रीले बोलाएको सर्वदलीय बैठकको अौचित्य छैन। बरु यतिखेर सर्वदलीय बैठक त प्रमुख प्रतिपक्ष दल कांग्रेसकै नेतृत्वमा भ्रष्टाचार बिरुद्ध मोर्चाबन्दी कस्नका लागि आवश्यक छ। @DeubaSherbdr

— Dhan Raj Gurung (@dhanrgrg) December 8, 2020

ओलीले मंगलबार बिहान ११ बजे संघीय संसद्‍मा प्रतिनिधित्व गर्ने राष्ट्रिय दलको सर्वदलीय बैठक आह्वान गरेका छन् । प्रधानमन्त्रीले पछिल्‍लो राजनीतिक अवस्थाबारे छलफल गर्न बैठक बोलाएका हुन । देशमा कोभिड-१९ को मार खेपिरहेको छ भने अर्कातिर राजावादीहरुले आन्दोलन चर्काइरहेका छन् । केही समययता राजावादीहरूले देशका विभिन्‍न ठाउँमा आन्दोलन गरिरहेका छन् ।

सत्तारुढ नेकपाभित्र पनि विवाद चर्कंदो छ । अध्यक्षद्वय ओली र पुष्पकमल दाहालको फरक-फरक राजनीतिक प्रस्ताव सचिवालयमा नटुंगिएपछि स्थायी कमिटीमा पुगेको छ । पटक-पटक सचिवालय बैठक छलेका प्रधानमन्त्री ओलीले आइतबार बसेको स्थायी कमिटी पनि छलेका थिए ।

पछिल्‍लो पटक बैशाख ३१ गते सर्वदलीय बैठक बसेको थियो । त्यसयता सर्वदलीय बैठक बसेको छैन् ।