क्रियाशील सदस्यता विवाद समाधानका लागि देउवा-पौडेलबीच छलफल

काठमाडौँ - नेपाली कांग्रेसको क्रियाशील सदस्यता विवाद समाधानका सन्दर्भमा पार्टी शीर्ष नेताबीच शनिबार अनौपचारिक छलफल भएको छ । क्रियाशील सदस्यताको बाँकी विवाद समाधान गर्ने जिम्मेवारी पाएका पूर्वमहामन्त्री कृष्णप्रसाद सिटौला, केन्द्रीय सदस्यहरू डा. मिनेन्द्र रिजाल र रमेश लेखकले शनिबार सभापति शेरबहादुर देउवा र वरिष्ठ नेता रामचन्द्र पौडेलसँग छलफल गरेका हुन् ।

प्रधानमन्त्रीसमेत रहेका सभापति देउवा र वरिष्ठ नेता  पौडेलसँग उनीहरूले बालुवाटारमा अनौपचारिक छलफल गरेका हुन् ।  महाधिवेशनको कार्यक्रम सुरु हुन १२ दिन मात्रै बाँकी रहँदा पनि कांग्रेसले क्रियाशील सदस्यतासम्बन्धी विवाद समाधान गर्न सकेको छैन । क्रियाशील सदस्यताको बाँकी काम टुंग्याउने जिम्मा पाएका पूर्वमहामन्त्री सिटौला, केन्द्रीय सदस्यहरु डा. रिजाल र लेखकले सहमतिको खाका तयार गरेको जनाएका छन् ।

शुक्रबार पनि तीन नेता सम्मिलित समितिले सभापति देउवा र वरिष्ठ नेता पौडेलसँग छलफल गर्दै सहमतिका लागि शनिबारसम्मको समय मागेको थियो । कांग्रेसले १८ भदौमा वडा अधिवेशनको मिति तय गरेको छ । तर अहिलेसम्म निर्वाचन समितिले क्रियाशील सदस्यताको अन्तिम सूची तयार गर्नसकेको छैन ।

३० साउनमा सम्पन्न कांग्रेस केन्द्रीय समिति बैठकले क्रियाशील सदस्यतासम्बन्धी बाँकी काम टुंग्याउने जिम्मेवारी तीन नेतालाई दिएको थियो । २ भदौमा सहमति गरेर ३ भदौमा सभापतिलाई सूची बुझाउनुपर्ने केन्द्रीय समितिको निर्णय थियो । तर उक्त समयसीमा कटिसक्दा पनि समितिले सूची बुझाउन सकेको छैन ।