बिउ किनेर झन्डै पाँच लाख हिनामिना गर्ने कर्मचारीविरुद्ध मुद्दा

काठमाडौँ – बिउ खरिद गरी छर्नका लागि महँगोमा खरिद गरी रकम हिनामिना गरेको आरोपमा वन कार्यालयका कर्मचारीहरूविरुद्ध अख्तियार दुरुपयोग अनुसन्धान आयोगले मुद्दा दायर गरेको हो । आर्थिक वर्ष २०७३/७४ मा बाराको तत्कालीन जिल्ला वन कार्यालयका कर्मचारीहरूले चार लाख ९० हजार रुपैयाँ हिनामिना गरेको हो ।

बाँसको कलमी विरुवा उत्पादन वा खरिद तथा सदुपयोग, अम्रिसो विरुवा उत्पादन वा खरिद तथा वितरण, नदी उकास जग्गामा खयर, सिसौ, सिमल आदि प्रजातिका बिउ खरिद गरी छर्ने समेतको कार्य गर्नको लागि लिएको पेश्की रकम हिनामिना गरेको तथ्य खुलेको छ ।

तत्कालिन जिल्ला वन अधिकृत भैरव प्रसाद घिमिरे, तत्कालिन सहायक वन अधिकृत बिन्देश्वर प्रसाद पटेल र तत्कालीन सहायक वन अधिकृत दिनेश प्रसाद जायसवालविरुद्ध जनही चार लाख ९० हजार रुपैयाँको मुद्दा दायर गरेको हो ।