मनोमानी गाउँसभा गरेको भन्दै उपाध्यक्षले दिइन् अध्यक्षविरुद्ध मुद्दा

फाइल फोटो

जनकपुरधाम - सिरहाको औरही गाउँपालिकाकी उपाध्यक्ष सीता कुमारी यादवले गाउँपालिका अध्यक्षविरुद्ध अदालतमा मुद्दा दायर गरेकी छन् । अध्यक्ष सिद्धार्थ यादवले आफूलाई जानकारी नदिएरै छैटौ गाउँसभा सम्पन्न गरेको भन्दै उपाध्यक्ष यादवले उच्च अदालत जनकपुरधामको राजविराज इजलासमा मुद्दा दायर गरेकी हुन् ।

ईकागजसँग कुरा गर्दै उपाध्यक्ष सीता यादवले भनिन्, ‘पालिकाको कुनै पनि बैठक वा सभामा उपाध्यक्ष लगायतका कुनै पनि कार्यपालिका सदस्यलाई बाइपास गर्न नपाइने व्यवस्था छ । तर आफूलाई बिना कुनै जानकारी नदिई छैठो गाउँ सभा सम्पन्न गरी आर्थिक वर्ष २०७८–७९ को योजना छनोट तथा बजेट विनियोजन गरेको छ ।’

आफूलाई पछिल्ला गाउँ सभामा मात्रै होइन, हरेक बैठकमा आफूलाई बाइपास गरेर अध्यक्ष सिद्धार्थ यादव र प्रशासकीय अधिकृत रामनारायण साहले विभिन्न निर्णयहरु गर्दै बजेट मनपरी रुपमा चलाउँदै आएको कारण बाध्य भई भदौ २ गते उच्च अदालतमा मुद्दा दायर गर्नु परेको उनले बताइन् । उच्च अदालतले अध्यक्ष यादव र अधिकृत साहलाई गाउँ सभा गरेको सक्कल प्रमाणहरुको कागजात सहित उपस्थित हुन भदौ १४ गते छलफलका लागि बोलाएको छ ।