सनाखतका लागि माधव नेपालसहितका नेताहरू आयोग पुगे

काठमाडौँ - प्रस्तावित नेकपा एकीकृत समाजवादीका केन्द्रीय सदस्‍य र सांसदहरू सनाखत गर्न निर्वाचन आयोग पुगेका छन् । माधव नेपाल नेतृत्वको समाजवादीका नेताहरू चन्द्रागिरिबाट सिधैँ निर्वाचन आयोग पुगेका हुन् । उनीहरू सोमबारदेखि चन्द्रागिरिमा बसेका थिए । 

निर्वाचन आयोगले आज उनीहरूलाई सनाखतका लागि सशरीर भौतिकरूपमा आयोगमा उपस्थित हुन भनेको थियो । प्रधानमन्त्री शेरबहादुर देउवा सरकारले संसदीय दल र केन्द्रीय समितिमा २० प्रतिशतको समर्थनमा दल विभाजन हुनसक्ने अध्यादेश जारी गरेसँगै यी दुवै दलले औपचारिकरूपमा विभाजित भई नयाँ दल दर्ताका लागि आवेदन दिएका थिए।