मन्त्रिपरिषद्‍ निर्णय : बंगलादेशबाट जीटूजीमा मल खरिद गर्ने

फाइल तस्बिर

काठमाडौं : सरकारले कृषि विकास तथा पशुपंक्षी मन्त्रालयको प्रस्तावमा बंगलादेशबाट ५० हजार मेट्रिक टन युरिया मल सरकार-सरकार(जीटूजी ) सम्झौतामा खरिद गर्न सैध्दान्तिक स्वीकृति दिएको छ । प्रवक्ता पार्वत गुरुङले बुधबार मंसिर १५, १८ र २३ गते बसेका मन्त्रिपरिषद्को बैठकको निर्णय सार्वजनिक गर्दै त्यस्तो जानकारी दिएका  छन् । मन्त्रिपरिषद्ले पछिल्ला बैठकमा झन्डै १४.१५ अर्ब रुपैयाँ ऋण स्वीकार गर्ने निर्णय गरेको छ ।
  
प्राथमिकताप्राप्त नदी बेसिन बाढी जोखिम व्यवस्थापन आयोजनाका लागि एशियाली विकास बैंकबाट प्राप्त हुने ४० मिलियन अमेरिकी डलर (चार अर्ब ७७ करोड रुपैयाँ) बराबरको सहुलियत पूर्ण ऋण र १० मिलियन अमेरिकी डलर (१ अर्ब १९ करोड रुपैयाँ) अनुदान सहायता स्वीकार गर्ने बताएको छ ।  ग्रामीण उद्यम तथा आर्थिक विकास आयोजना सञ्‍चालन गर्न विश्‍व बैंकबाट प्राप्त हुने ८० अमेरिकी डलर (करिब ९ अर्ब ३८ करोड रुपैयाँ) सहुलितयपूर्ण ऋण सहायता स्वीकार गरेको छ ।
 
सरकारले पाइपलाइनबाट पेट्रोलियम पदार्थ ढुवानी सुरक्षा नियमन आदेश २०७७ स्वीकृत गरेको छ । उत्पत्तिको प्रमाणपत्र जारी गर्ने सम्बन्धी कार्यविधि स्वीकृत गर्ने निर्णय गरेको समेत छ । 
  
आयोजनाको बहुवर्षीय ठेक्कासम्बन्धी मापदण्ड संशोधन गर्ने निर्णयमा उल्लेख छ । मन्त्री गुरुङले भने, 'केही बहुवर्षिय ठेक्काको म्याद सकिएको थियो । म्याद थपका लागि मापदण्ड संशोधन गरिएको हो ।'