‘एभेन्जर’लाईलाई पछि पार्दै ‘स्पाइडरमेन’ बन्यो सर्वाधिक हेरिने ट्रेलर

लसएन्जल्स :  दुई वर्षअघि प्रदर्शनमा आएको ‘एभेन्जर एन्ड गेम’ले थुप्रै रेकर्ड कायम गरेको थियो । बक्स अफिसमा ‘अवतार’को कमाइलाई उछिनेर इतिहासमै सबैभन्दा बढी कमाउने फिल्मको रेकर्ड कायम गरेको ‘एभेन्जर’ले ट्रेलर सार्वजनिक हुँदा पनि रेकर्ड कायम गरेको थियो । यो रेकर्ड थियो २४ घन्टामा सर्वाधिक हेरिने ट्रेलरको रेकर्ड । 

दुई वर्षपछि यो रेकर्ड भत्काएको छ ‘स्पाइडरमेन ः नो वे होम’को ट्रेलरले । यो फिल्मको ट्रेलरले २४ घन्टामा ३ सय ५५.५ मिलियन दर्शक पाएको छ जुन ‘एभेन्जर’ले यही समयमा पाएभन्दा ६५ मिलियन बढी हो । हलिउडतिर बाहिरिएको जानकारीअनुसार ‘एभेन्जर’ले उस समय यति नै समयावधिमा २ सय ८९ मिलियन दर्शक पाएको थियो । 

‘स्पाइडरमेन’को यो उपलब्धि उल्लेख्य यसकारण पनि छ कि यो फिल्मको ट्रेलर एक दिन अघि नै पाइरेसी भएको थियो । सार्वजनिक गर्न ठिक्क पारेको ट्रेलर अनलाइनमा लिक भएपछि मार्भलले अर्को दिन हतार हतार ट्रेलर सार्वजनिक गरेको थियो । त्यसका बावजुद ट्रेलर हेर्ने दर्शकको चाहमा कुनै कमी आएको थिएन । 
टम हल्यान्ड र जेन्दयाको मुख्य भूमिका रहेको फिल्ममा बेनेडिक्ट कुमरवाच पनि अतिथि भूमिकामा छन् । यो फिल्म डिसेम्बर २१ मा यही साल रिलिज हुँदैछ ।