नेकपा एकीकृत समाजवादी पार्टी सरकारमा जाने

काठमाडौँ - नेकपा (एकीकृत समाजवादी) पार्टीले सरकारमा जाने निर्णय गरेको छ । शुक्रबार काठमाडौंमा बसेको पार्टी स्थायी कमिटीको पहिलो बैठकले यस्तो निर्णय गरेको हो । 

प्रधानमन्त्री शेरबहादुर देउवासहित सत्ता गठबन्धनका शीर्ष नेताबीच छलफलपछि आफ्नो भागमा पर्ने मन्त्रालय टुंगो लागेपछि पार्टीले सरकारमा पठाउने मन्त्री तोक्ने बैठकले निर्णय गरेको छ । ‘प्रधानमन्त्रीसहित सत्ता साझेदार दलहरूबीच मन्त्रालय टुंगिएपछि मन्त्री चयन गर्ने निर्णय भएको छ,’ एक नेताले भने ।

मन्त्रिपरिषद् विस्तारका लागि प्रधानमन्त्री देउवाले एकीकृत समाजवादीको निर्णय पर्खिरहेको अवस्थामा पार्टीले सरकारमा जाने निर्णय गरेपछि अब मन्त्रिपरिषद् विस्तारको बाटो खुलेको छ । नेकपा एमाले विभाजन गरेर चार भदौमा नयाँ दल दर्ता भएको एकीकृत समाजवादीले बुधबार निर्वाचन आयोगबाट प्रमाणपत्र पाए हो । ‘हामीले सरकारमा सहभागी हुने निर्णय गरेका छौं । मन्त्रालय संख्या पनि लगभग टुंगिएको छ,’ बैठकको निर्णय सुनाउँदै ती नेताले भने । सत्ता साझेदार दलका नेताहरुबीच एकीकृत समाजवादीले सात मन्त्रालय लिने अनौपचारिक सहमति भएको छ ।