एमालेले भन्यो : अष्टलक्ष्मी नेतृत्वको सरकार अल्पमतमा पर्‍यो, संसदीय खेल खेल्छौँ

काठमाडौँ – नेकपा एमालेले बागमती प्रदेशम अष्टलक्ष्मी शाक्य नेतृत्वको सरकार अल्पमतमा परेसँगै संसदीय खेल सुरु भएको जनाएको छ । एमालेका १२ सांसदले एमाले नै विभाजन गरेर नेकपा(एकीकृत समाजवादी) दर्ता गरेका माधवकुमार नेपाल नेतृत्वको दलको तर्फमा सनाखत गरेसँगै शाक्य नेतृत्वको सरकार अल्पमतमा परेको हो । 

एमालेले पनि शाक्य नेतृत्वको सरकार अल्पमतमा परेको स्वीकारेको छ । ‘एमाले विभाजनपछिको असर देखियो । अब हामी कानुनी प्रक्रिया अनुसार अघि बढ्छौँ । बागमती प्रदेश सरकार स्वभाविक रुपमा अल्पमतमा परेको छ । हामी संविधानका अन्य धाराहरुको प्रयोग गरी सरकार जोगाउने छलफलमा छौँ,’ एमाले बागमती प्रदेश सभाका प्रमुख सचेतक रमेश निरौलाले भने, ‘यसका लागि एकभन्दा धेरै दलसँगको सहकार्यमा गर्नुपर्छ । शाक्यकै नेतृत्वमा नयाँ सरकार बनाउने नेकपा एमालेको अभियान सुरु हुन्छ ।’ 

प्रदेश सभामा धेरै सांसद भएका दल गठबन्धनकै छन् नि भन्ने प्रश्नमा उनले भने, ‘संसदीय प्रक्रियामा धेरै कुरा हुन्छ । सबै कुरा नभनौँ । खेल सुरु हुन्छ ।’