महन्थ ठाकुर भन्छन् : जसपा भन्दा लोसपा बलियो छ

जनकपुर –  जनता समाजवादी पार्टी (जसपा) विभाजन भएर बनेको लोकतान्त्रिक समाजवादी पार्टी (लोसपा)का अध्यक्ष महन्थ ठाकुरले जसपाभन्दा आफ्नो पार्टी बलियो रहेको दाबी गरेका छन् ।  

प्रदेश सांसदहरुसँग दल सनाखत सम्बन्धमा छलफलका लागि बुधबार जनकपुरधाम आएका अध्यक्ष ठाकुरले जनकपुर विमानस्थलमा संचारकर्मीसँग भने, ‘कसैले भन्छ लोसपा भन्दा जसपा बलियो हो, त्यो उनको दिवा सपना हो, अंकगणितीय रुपमा मजबुत होला तर  धरातलीय रुपमा लोसपा नै मजबुत छ ।’

उनले संघीय र प्रदेशका केही सांसद लोभमा परेर जसपामा लागेको पनि बताए ।  
‘जुन लोभमा केही सांसद जसपामा गएका छन, तिनीहरु पनि पद नपाएपछि र चुनावको समयमा हामी सँगै आउनेछन्’ उनले भने ।  

तत्कालिन राजपा नेपालबाट निर्वाचित केही जनप्रतिनिधि तथा प्रदेश सभा सदस्यहरु जसपामा लागेपछि तिनीहरुलाई आफूतिर फर्काउन लोसपामा सनाखत गर्न छलफलका लागि अध्यक्ष ठाकुरसँगै वरिष्ठ नेताद्वय राजेन्द्र महतो र शरतसिंह भण्डारी पनि जनकपुरधाम आएका छन ।