नेपालले मंगलबार पपुवा न्युगिनीको सामना गर्दै

काठमाडौँ- आईसीसी क्रिकेट विश्वकप लिग–२ अन्तर्गतको त्रिदेशीय श्रृंखला खेल्न नेपाली राष्ट्रिय क्रिकेट टिम यतिबेला ओमानमा छ । यस श्रृंखलामा नेपाल र घरेलु टिम ओमान बाहेक अमेरिका पनि सहभागी छ । सेप्टेम्बर १३ बाट सुरु हुने श्रृंखलाअघि नेपालले पपुवा न्युगिनीसँग एक दिवशीय खेल पनि खेल्दैछ । 

नेपाल र पपुवा न्युगिनीबीचको पहिलो खेल मंगलबार हुँदैछ । ओमान क्रिकेट एकेडेमीको मैदानमा दुई टिमबीचको खेल नेपाली समय अनुसार ११ः१५ बाट सुरु हुनेछ । त्रिदेशीय श्रृंखलाका लागि तयारी गर्नका लागि १९ सदस्यीय नेपाली टोली गत अगस्ट २५ मै ओमान पुगेको हो । नेपाली टोलीको कप्तानी ज्ञानेन्द्र मल्लले गरेका छन् । 

ओमान भ्रमण डेभ ह्वाटमोरका लागि नेपालको प्रशिक्षकका हैसियतले अन्तिम हुनेछ । उनले गत साता मात्रै नेपाल क्रिकेट संघ (क्यान) समक्ष इ–मेलमार्फत राजीनामा बुझाइसकेका छन् । गत डिसेम्बरमा नेपालको मुख्य प्रशिक्षकमा नियुत्त भएका ह्वाटमोरले व्यक्तिगत, पारिवारिक तथा कोभिड–१९ महामारीको कारण देखाउँदै राजीनामा दिएका हुन् ।