गण्डकीमा पुस्तकालय स्थापना गर्ने योजना ल्याउँदैछौं : मुख्यमन्त्री पोखरेल

पोखरा – गण्डकी प्रदेशका मुख्यमन्त्री कृष्णचन्द्र नेपाली पोखरेलले प्रदेशमा केन्द्रीय पुस्तकालय निर्माणको योजना ल्याइने बताएका छन् । पोखरा सार्वजनिक पुस्तकालयद्वारा सोमबार आयोजित ‘गण्डकी प्रदेश केन्द्रीय पुस्तकालय स्थापना’ विषयक अन्तरक्रिया कार्यक्रमलाई सम्बोधन गर्दै उनले यस्तो बताएका हुन् ।

‘गण्डकी सरकारले गण्डकी प्रदेश केन्द्रीय पुस्तकालय स्थापना गर्ने सोच अघि सारेको छ,’ मुख्यमन्त्री पोखरेलले भने । प्रदेशको चिनारी दिने गरी पुस्तकालय स्थापना हुनुपर्नेमा जोड दिँदै उनले विगतमा शासकहरूलेसमेत पुस्तकालयको महत्व बुझेको उल्लेख गरे । मुख्यमन्त्री पोखरेलले १४ औं पुस्तकालय दिवसका अवसरमा आयोजित गण्डकी प्रदेशस्तरीय कविता प्रतियोगिताका विजेतालाई पुरस्कार तथा प्रमाणपत्र पनि प्रदान गरेका छन् । 

गण्डकीका शिक्षा, संस्कृति विज्ञान प्रविधि तथा सामाजिक विकासमन्त्री मेखलाल श्रेष्ठले प्रदेशको पहिचान दिने किसिमका सामग्रीहरूलाई पुस्तकालयमा राख्नुपर्नेमा जोड दिए । कानुन, सञ्चार तथा प्रदेश मामिलामन्त्री बिन्दुकुमार थापाले पुस्तकालय निर्माण प्राथमिकतामा रहेको बताउँदै सञ्चालित पुस्तकालयमा प्रभावकारी व्यवस्थापनको आवश्यकता औंल्याए ।

पोखरा सार्वजनिक पुस्तकालयका अध्यक्ष प्रा.डा विश्व श्रेष्ठले ०४६ सालपछि पुस्तकालय स्थापनामा जागरण सुरु भएको चर्चा गर्दै पुस्तकालयलाई राज्यले प्राथमिकताका साथ हेर्नुपर्नेमा जोड दिए । गण्डकी प्रदेश पुस्तकालय स्थापनाको योजनालाई चाँडै कार्यान्वयन गर्न उनले मुख्यमन्त्रीसमक्ष अनुरोध गरे । 

पोखरा सार्वजनिक पुस्तकालय सञ्चालक समितिका सदस्य एवम् पश्चिमाञ्चल विकास मञ्चका पूर्वमहासचिव धर्मराज बरालले पुस्तकालय समाजको सभ्यता भएको बताउँदै प्रदेशमा स्थापना गर्न लागिएको पुस्तकालय विशिष्ट पहिचान बोकेको हुनुपर्ने आवश्यकता औंल्याए । कार्यक्रममा मुख्यमन्त्री पोखरेलले परम्परागत पुस्तकालयलाई समयसापेक्ष जोड्नु चुनौती भएकोसमेत बताएका छन् ।