सत्तारुढ दलको बैठकलगत्तै प्रधानमन्त्रीले बोलाए मन्त्रिपरिषद्‌ बैठक

फाइल तस्बिर

काठमाडौँ- सत्तारुढ दलको शीर्ष नेताहरूको बैठक सकिएलगत्तै मन्त्रिपरिषद्‌ बैठक बस्‍दैछ । प्रधानमन्त्री शेरबहादुर देउवाले शुक्रबार बिहान ११:४५ बजे मन्त्रिपरिषद्‌ बैठक बस्‍ने एक मन्त्रीले जानकारी दिए । ति मन्त्रीका अनुसार आजको मन्त्रिपरिषद्‌ बैठकमा महत्वपूर्ण निर्णय गर्न सक्‍नेछ ।

त्यस्तै मन्त्रिपरिषद्‌ बैठकअघि नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा) र  राष्ट्रिय जनमोर्चाका शीर्ष नेताको बैठक ९ बजे प्रधानमन्‍त्रीको सरकारी निवास बालुवाटारमा बस्‍दैछ ।

बैठकमा सरकारलाई पूर्णता दिनेबारे छलफल हुने बताइएको छ । गठबन्धनको शीर्ष नेताको बैठक बिहीबार पनि बसेको थियो । तर, कुनै सहमति भने हुन सकेन । बिहीबारको बैठकले मन्त्रिपरिषद् विस्तार चाँडोभन्दा चाँडो गर्ने निष्कर्ष निकालेको थियो। आजको बैठकमा एमसीसीबारेमा साझा धारणा बनाउने बारेमा समेत छलफल गर्ने बताइएको छ।