सञ्‍चार मन्त्री गुरुङ महासंघसँग सहकार्य गरेर अगाडी बढ्ने

काठमाडौं : सञ्‍चार तथा सूचना प्रविधिमन्त्री पार्वत गुरुङले पत्रकारितासँग सम्बन्धित विषयमा नेपाल पत्रकार महासंघसँग सहकार्य गरेर अगाडी बढने बताएका छन् । आइतबार मन्त्री निवास पुल्चोकमा महासंघका पदाधिकारीसँग भएको मन्त्री गुरुङले सञ्‍चार क्षेत्रको हित हुने गरी आवश्यक नीति, कानून र संरचना निर्माण गरिने बताए । प्रेस स्वतन्त्रताको संरक्षण, प्रवर्दन, स्वतन्त्र प्रेसको व्यावसायिक र संस्थागत विकास एवम् पत्रकारको पेशागत हितका पक्षमा आफू सदैव अडिग रहने मन्त्री गुरुङको भनाइ थियो । 

महासंघका अध्यक्ष गोविन्द आचार्यले मन्त्री गुरुङलाई सफल कार्यकालका लागि शुभकामना दिँदै सञ्‍चार क्षेत्रमा विद्यमान समस्या समाधानका लागि सरकारबाट पहल हुनुपर्ने बताए । महासंघले कोभिड-१९ पछिको अवस्थामा सरकार, श्रमजीवी पत्रकार र मिडिया सञ्‍चालकबीच गम्भीर छलफल र आपसी सहकार्य हुनुपर्ने धारणाा महासंघको रहेको उल्लेख गर्दै आचार्यले श्रमजीवी पत्रकार ऐनको पूर्ण कार्यान्वयन, आमसञ्‍चार नीति २०७३ अनुरुप कानून र संरचना निर्माण गर्नु पर्ने बताए । सञ्‍चार क्षेत्रमा पुनःसंरचना गरी संघीयता र समावेशिताको कार्यान्वयन गर्न पनि महासंघले मन्त्री गुरुङलाई आग्रह गरेको छ । 

मन्त्री गुरुङलाई भेट्न अध्यक्ष आचार्य, महासचिव रमेश विष्ट, सचिव रामप्रसाद दाहालसहितको टोली मन्त्री निवास पुल्चोक पुगेको थियो । 

मन्त्री गुरुङले गत असोज २९ गतेबाट सञ्‍चार मन्त्रालयको जिम्मेवारी सम्हालेका थिए ।