नारायणकाजीमाथि बाबुराम र ईश्‍वरको प्रहार : चरित्र हत्या गर्नेमाथि अदालत जाने तयारीमा सुशन

काठमाडौं : सत्तारुढ नेकपाका सचिवालय सदस्य तथा प्रवक्ता नारायणकाजी श्रेष्ठ बहुविवादमा छन् । उनी राजनीतिक प्रतिस्पर्धीको राम्रै प्रहारमा छन् । एकै जिल्लावासी, कुनै बेला एकै राजनीतिक लडाईंमा होमिएका डा. बाबुराम भट्टराईको शब्द प्रहार चाहिँ श्रेष्ठविरुध्द चर्कै छ । डा. भट्टराई ट्‍वीटमा लेख्छन्, ‘आफ्नो नाममा कुनै देखल सम्पत्ति नराख्‍ने ! वैधानिक तलबभत्ता नलिएर वाहवाही कमाउने ! आसेपासेहरूका नाममा रातारात करोडौं र अर्बौं सम्पत्ति जम्मा हुने !’ यतिमात्र होइन, भट्टराई थप्छन्, ‘उनीहरूका विवादमा मध्यस्थता गर्ने ! ऐय्यासी जीवन बिताउने ! यही त हो 'क्रोनी क्यापिटालिज्म' कणहरू ! एक अर्कालाई ढाकछोप गरौं ! नेपाली विशेषताको समाजवाद ?’

श्रेष्ठले मुलुक विषम परिस्थितिमा भएको भन्दै आफूले एक वर्षको तलब नलिने घोषणा गरेका थिए । त्यो घोषणाले उनीसहित अन्य समकक्षी नेताहरूलाई एक प्रकारको नैतिक दवाब परेको थियो । २०७४ को संघीय निर्वाचनमा गोरखा-२ मा भट्टराईसँग श्रेष्ठ झिनो मतले पराजित भएका थिए । डा. भट्टराई कांग्रेस गठबन्धनको साझा नेताका रुपमा श्रेष्ठसँग चुनाव लडेका थिए । उनीहरुबीच घोचपेच सामान्य हो ।

खासगरी गोरखा-२ को चुनावी प्रतिस्पर्धामा दुवै जना उत्रेपछि त्यो झन् बढेको थियो । भट्टराई गोरखा खोप्लाङका हुन् भने श्रेष्ठ जौबारीका । उनीहरू एउटै जिल्लामा जन्मे हुर्के । तर  भावनात्मक सम्बन्ध त झनै छैन, उनीहरुबीच । भिन्‍न पृष्ठभूमिबाट कम्युनिस्ट पार्टी र आन्दोलनमा जोडिएका यी दुवै नेता कुनै बेला एकै पार्टीमा अटे । डा. भट्टराई प्रधानमन्त्री हुँदा श्रेष्ठ उपप्रधानमन्त्री पनि भए । श्रेष्ठ भन्दा उमेरमा ६-७ वर्ष जेठा छन्, भट्टराई । पृष्ठभूमि भने दुवैको प्रारभिक राजनीतिक पृष्ठभूमि भने कांग्रेसी थियो । दुवै पछि कम्युनिष्ट बनेका हुन् ।

आफ्नो नाममा कुनै देखल सम्पत्ति नराख्ने! वैधानिक तलवभत्ता नलिएर वाहवाही कमाउने!आसेपासेहरूका नाममा रातारात करोडौं/अरबौं सम्पत्ति जम्मा हुने! उनीहरूका विवादमा मध्यस्थता गर्ने!ऐय्यासी जीवन बिताउने!यही त हो क्रोनी क्यापिटालिज्म कणहरू! एक अर्कालाई ढाकछोप गरौं! नेपाली विशेषताको समाजवाद?

— Baburam Bhattarai (@brb1954) December 13, 2020

एकै पार्टीमा रहँदा मात्र होइन, एकै मन्त्रिपरिषद्‍मा रहँदासमेत एकले अर्कोलाई स्वीकार्न नसक्ने, सधैँका प्रतिस्पर्धी जस्तै रहे उनीहरु । भट्टराईले भारतसँग विप्पा गराउँदा त्यसको जानकारी श्रेष्ठलाई दिएनन । उनले त्यतिबेला भ्रमणको विरोध गरेका थिए । 

पोखरेल पनि श्रेष्ठविरुध्द
उता एकै सचिवालका सदस्य उपप्रधानमन्त्री ईश्वर पोखरेल श्रेष्ठ पनि घोचपेचमा छन् । डा. भट्टराई खुला छन् भने पोखरेल घुमाउरो शैलीमा । कोभिड-१९ को संक्रमणका कारण नेकपा केन्द्रीय सदस्य तथा पूर्वराजदूत कमानसिंह लामाको निधन भयो । पोखरेलले पनि लामालाई श्रद्धाञ्जली दिँदै श्रेष्ठविरुधद् घुमाउरो शब्द प्रयोग गरेका छन् । उनले बिहीबार एक ट्‍वीट सन्देशमा लेखेका छन्, ‘कमरेड कमानसिंह लामा अब हामीबीच रहनु भएन ! हार्दिक श्रद्धाञ्जली ! तर उहाँले आफू सम्वद्ध कम्युनिष्ट पार्टीलाई अझ यसमा आवद्ध ‘कम्युनिष्ट आदर्श’ को कुरा गरेर नथाक्नेहरूका लागि चुनौतीपूर्ण प्रश्न गरेर जानुभएको छ । अलविदा कमरेड कमानसिंह लामा !’

कमरेड कमानसिंह लामा अब हामीविच रहनु भएन ! हार्दिक श्रद्धान्जली ! तर वहाँले आफू सम्वद्ध कम्युनिष्ट पार्टीलाई - अझ यसमा आवद्ध ‘ कम्युनिष्ट आदर्श’ को कुरा गरेर नथाक्नेहरूका लागि चुनौतीपूर्ण प्रश्न गरेर जानुभएकोछ। अलविदा कमरेड कमानसिंह लामा !

— Ishwar Pokhrel (@IshwarPokhrel) December 10, 2020

उता यो प्रकरणमा श्रेष्ठ भनाइ छ, ‘कमानसिंह र म लामो समयदेखिको सहयोद्धा हौँ, एउटा हाइड्रोको सेयरको विवादमा उहाँकै अनुरोधमा मैले मध्यस्थता गर्न खोजेको हुँ । आफू गलत नभएको र जोसुकैले जुनसुकै कोणबाट अनुसन्धान गरे पनि हुन्छ । दोषी देखिए दण्ड भोग्न तयार छु । लामाको निधनको दु:खद खबरबाट आफू मर्माहत भएको अवस्थामा यस्तो खवरले झन दुखी छु ।’

अदालत जाने तयारीमा सुशन
मृतक लामा र श्रेष्ठको स्वकीय सचिवसमेत रहेकी युवा व्यवसायी सुशन कर्माचार्यबीचको लेनदेन बाहिरिएपछि ‘प्रकरण’को रुप धारण गरेको हो । त्यो विषय सहजीकरण गर्न श्रेष्ठ अघि सरेको भिडियो सार्वजनिक भएपछि सुशन कर्माचार्य पनि विवादमा तानिएकी छन् ।

भिडियो र अडियोमा देखिएका-सुनिएका संवादमा श्रेष्ठले लामा, स्वकीय सचिव कर्माचार्य र इन्द्र तामाङ (लामाको श्रीमती) बीचको विवाद मिलाउन भूमिका निर्वाह गरेको देखिन्छ । कमानसिंह लामाको निधन लगत्तै सुशन कर्माचार्यको फेसबुक पोष्टबाट श्रेष्ठसँग बसेका तस्बिरले सामाजिक सञ्जाल रंगिन पुगेको छ । जसमा श्रेष्ठ इतरका नेता-कार्यकर्ता बढी सक्रिय देखिन्छ ।

सुशन जापानमा अध्ययन गरेर फर्केकी हुन् भने अन्तराष्ट्रिय व्यवसायमा समेत सक्रिय छिन । उनी कन्स्ट्रक्सन, हाइड्रो, शिक्षा, वित्त, साना उद्योग क्षेत्रमा संलग्न छिन् । उनको श्रीमान र एक छोरीसमेत व्यवसायमै छन् । उता सुसन सामाजिक सञ्‍जालमा अनेकन अर्थ लगाउँदै तस्बिर रंग्याउनेविरुध्द अदालत जाने तयारीमा रहेको उनी निकटवर्तीहरुले बताए । उनले अधिकतम कार्यकर्ताको आइडीसहित आफू र श्रेष्ठको चरित्रहत्याको किटानी जाहेरी तथा फेक आइडीको सोर्ससहित उजुरीको तयारीमा भएको उनका निकटस्थहरुले बताएका छन् ।