दुई वटा मोटरसाइकल ठोक्किदा एक जनाको मृत्यु

फाइल फोटो

जनकपुरधाम - धनुषाको मिथिला नगरपालिका ६ ढल्केवरमा दुई वटा मोटरसाइकल आपसमा ठोक्किदा एक जनाको घटनास्थलमै मृत्यु भएको छ । पूर्व–पश्चिम राजमार्ग अन्तर्गत ढल्केवरस्थित पुर्व चौकमा पूर्वबाट पश्चिमतर्फ आइरहेको लु. ७२ प. ४७९२ नम्बरको मोटरसाइकल र विपरित दिशाबाट गइरहेको स. ४ प. ७९२६ नम्बरको मोटरसाइकल एक आपसमा ठोक्किएर भएको दुर्घटनामा परी एक जना मोटरसाइकलको मृत्यु भएको इलाका प्रहरी कार्यालय ढल्केवरले जनाएको छ ।

सो दुर्घटनामा परी स. ४ प. ७९२६ नम्बरको मोटरसाइकल चालक सिरहाको विष्णुपुर गाउँपालिका नरहाका अन्दाजी ३० वर्षीय रुपेश यादवको घटनास्थलमै मृत्यु भएको ईप्रका ढल्केवरका प्रहरी निरीक्षक प्रदीप सुवेदीले जानकारी दिएका छन ।

उनका अनुसार लु. ७२ प. ४७९२ नम्बरको मोटरसाइकल चालक धनुषाको गणेशमान चारनाथ नगरपालिका–६ बस्ने ४६ वर्षिय मोहम्मद हासिम घाइते भएका छन् ।  घाइतेको उपचार स्थानीय स्वास्थ्य केन्द्रमा भइरहेको र उनको अवस्था सामान्य रहेको प्रहरी निरीक्षक सुवेदीले जनाएको छ ।

दुवै मोटरसाइकल नियन्त्रणमा लिई मृतकको शव पोस्टमार्टमका लागि जनकपुरस्थित प्रादेशिक अस्पताल पठाइएको इलाका प्रहरी कार्यालय ढल्केवरले जनाएको छ ।