माछा मार्ने विषयमा झगडा, एकको मृत्यु

सप्तरी : बोदेबरसाइन नगरपालिका–३ कुशमारस्थित सार्वजनिक पोखरीमा माछा मार्ने विषयमा झगडा हुँदा एक महिलाको मृत्यु भएको छ । आइतबार राति झगडा तथा कुटपिट हुँदा ४५ वर्षीया गंगियादेवी मण्डलको घटनास्थलमै मृत्यु भएको हो ।

उक्त घटनामा संलग्न चार जनालाई प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने ५० वर्षीय शिव सरण मण्डल, ४७ वर्षीय विजय मण्डल, २२ वर्षीय सुरेन्द्र मण्डल र २८ वर्षीय रबित मण्डल रहेका छन् ।

इलाका प्रहरी कार्यालय बोधेबसाईन र इलाका प्रहरी कार्यालय कडरबोनाबाट खटिएको प्रहरीले कुटपिटमा संलग्न हुनेलाई पक्राउ गरेको हो । कुटपिटबाट घाइते भएका चार जनाको नर्सिङ होम लहान सिरहामा उपचार भइरहेको छ । कुटपिटमा संलग्न फरार तीन जनाको प्रहरीले खोजी गरिरहेको छ ।