‘कर्पोरेट–पे’ प्रणालीका लागि एनआईसी एसिया र एनसीएचएलबीच सम्झौता

काठमाडौंः एनआईसी एसिया बैंक लिमिटेडले यसका संस्थागत ग्राहक महानुभावहरूका निम्ति बैंक खाताबाटै विद्युतीय भुक्तानी गर्न सकिने ‘कर्पोरेट–पे’ प्रणालीको सुरुवात गरेको छ । यस सम्बन्धमा बैंकले नेपाल क्लियरिङ्ग हाउस लिमिटेड (एचसीएचएल) सँग सम्झौता गरेको छ । उक्त सम्झौतापत्रमा बैंकको तर्फबाट प्रमुख कार्यकारी अधिकृत रोशन कुमार न्यौपाने तथा एचसीएचएलका तर्फबाट प्रमुख कार्यकारी अधिकृत नीलेश मान सिंह प्रधानले हस्ताक्षर गरेका छन् । 

यो सम्झौताले एनआईसी एसिया बैंक ग्राहकले बैंकमा उपस्थित नभई रकम स्थानान्तरण, तलब भुक्तानी, भेन्डर भुक्तानी, सरकारी राजस्व भुक्तानी लगायत अन्य विभिन्न व्यावसायिक भुक्तानीहरू बैंक खातामार्फत् सहजै गर्न सक्नेछन् । उक्त प्रणाली मार्फत् कनेक्ट आइपीएस वा एनसीएचएल–आइपीएस भुक्तानी कारोबारहरू गर्न सकिने सुविधा रहेको बैंकले जनाएको छ । 

यस ‘कर्पोरेट–पे’ प्रणाली सुरुवात गर्नका लागि ग्राहकहरुले बैंकबाट आवश्यक प्रकृया पूरा गरी आवेदन दिन सक्नेछन् । ग्राहकले यो सेवा प्रयोग गरी तोकिएको कारोबार सीमा भित्र कुनै पनि भुक्तानीहरू बैंकको प्रत्यक्ष संलग्नता बिना नै गर्न सक्नेछन् । यस प्रणालीको सुरक्षित प्रयोग गर्न मल्टि–लेयर अथेन्टिकेसनको व्यवस्था गरिएको छ भने कुनै पनि कारोबार प्रविष्ट गर्न र स्वीकृत गर्न ग्राहक आफैले निर्धारण गरेको आधिकारिक प्रयोगकर्ताहरूले मात्र पाउने सुरक्षित बाटोको व्यवस्था गरिएका बैंकद्वारा जारी विज्ञप्तिमा उल्लेख छ ।