कम्युनिस्ट देश लुट्‍न आएका लुटेरा हुन् : रामचन्द्र पौडेल

तस्बिर : सरोज बैजु/इकागज

काठमाडौँ : नेपाली कांग्रेसका वरिष्ठ नेता रामचन्द्र पौडेलले नेपालका कम्युनिस्टहरूलाई देश लुट्न आएका लुटेराको संज्ञा दिएका छन् । कांग्रेसले आज मुलुकभर गरेको सडक आन्दोलनको क्रममा काठमाडौँको रत्नपार्कमा आयोजित कार्यक्रमलाई सम्बोधन गर्दै पौडेलले कम्युनिस्टबाट मुलुकको विकास हुने परिकल्पना पनि गर्न नसकिने बताए । ‘कम्युनिष्टहरू देश लुट्न आएका लुटेरा हुन्,’ पौडेलले भने, ‘उनीहरूबाट मुलुकको विकास हुन्छ भन्‍ने परिकल्पना पनि गर्न सकिन्‍न ।’

केपी शर्मा ओलीले प्रधानमन्त्रीको कुर्सीमा बस्ने नैतिकता गुमाइसकेको पौडेलको भनाइ छ । ओली नेतृत्वको सरकार कस्तो छ भनेर सत्तारूढ दल नेकपाकै अध्यक्ष पुष्पकमल दाहालले लिखित प्रतिवेदनमा भनिसकेकोले कांग्रेसले थप भन्‍न नपर्ने पौडेलले बताए ।

‘केपी शर्मा ओली नेतृतवको सरकारले संविधान, कानुन नियम विपरीत सर्वसत्तावाद लाद्‍ने काम गरेको छ । भ्रष्टाचारले सीमा नाघेको छ,’ पौडेलले भने, ‘ओली नेतृत्वको सरकार कस्तो छ, कांग्रेसले भन्‍न पर्दैन । नेकपाकै अध्यक्ष पुष्पकमल लाहालले पार्टी सचिवालयमा पेस गरेको प्रतिवेदनमा भनेका छन् । नेकपाकै सचिवालय र स्थायी समितिमा बहुमत सदस्यले सरकार असफल भयो भनेका छन् । तसर्थ प्रधानमन्त्री ओलीले सत्तामा बस्‍ने नैतिक हैसियत गुमाइसके ।’
 
कांग्रेस कुनै पनि अतिवादसँग नझुक्ने र अतिवाद लाद्‍न खोज्‍नेलाई तह लगाउने पौडेलले बताए । अहिले सरकारको असफलता र राष्ट्रपतिको अनावश्यक तामझामका कारण देशभर राजसंस्था व्युँताउने नारा लागेको पौडेलको आरोप छ । प्रतिवन्धित नेत्रविक्रम चन्द नेतृत्वको नेकपाले हंत्या हिंसाका घटना बढाउनुमा पनि सरकार कारक रहेको पौडेलले बताए । 

यो संसदको कार्यकाल रहदासम्म कांग्रेस सरकारमा नजाने भन्दै पौडेलले आगामी निर्वाचनमा ओली नेतृत्वको सरकारले गरेका कुकृत्यलाई जबरजस्त रूपमा जानतासामु लिएर जाने बताए । कांग्रेसलाई सुधार्ने उनको भनाइ थियो । कार्यक्रममा केन्द्रीय सदस्यद्वय नविन्द्रराज जोशी र डिला संग्रौलाले पनि सम्बोधन गरेका थिए ।