‘माग्ने बुढा’को लेखन रहेको ‘उकुसमुकुस’को प्रसारण सुरु

काठमाडौँ-  डिजिटल प्लेटफर्ममा लघु चलचित्र, हास्य सिरियल, सर्ट फिल्म लगायतकोे निर्माण ह्वात्तै बढेको छ । युट्युबमा दर्शकको आकर्षण बढेपछि कमेडी सिरियलको निर्माणमा पनि मेकरको ध्यान गएको छ ।

यसैबीच, हास्य सिरियल ‘उकुसमुकुस’को प्रसारण सुरु भएको छ । यो सिरियलको पहिलो भाग बुधबार आमा अग्निकुमार मिडिया नामक युट्युब च्यानलबाट प्रसारण भएकोे छ । अब, हरेक साताको बुधबार बेलुकी यो सिरियलको प्रसारण हुने निर्माता नहकुल भट्टराइले जानकारी दिए । यो युट्युबमा  स्वामित्व केदार घिमिरेको रहेको छ ।

दीलिप तामाङ्ग ‘हुरहुर’को निर्देशनमा तयार भएको यो सिरियललाई गोेल्ड फिल्मस्ले प्रस्तुत गरेको हो । केदार प्रसाद घिमिरे ‘माग्ने बुढा’को संवाद रहेको सिरियलमा दिलिपको नै कथा छ ।

सिरियलको श्रृङ्खला निर्देशक सीतादेवी तिमल्सेना हुन् । राहुल राईले छायांकन गरेको सिरियलको पहिलो भागमा टिकटक एपको क्रेजसँगै यसको राम्रा र नराम्रा दुबै पाटोलाई देखाउन खोजिएको छ ।

सिरियलमा जयनन्द लामा, भुइसाल लामा, दीलिप तामाङ, देवी आले, धनराम मुस्कान, प्रकाश लिम्बू, बेदना राई, नहकुल भट्टराई, दीपक लम्साल, टुल्कु तामाङको साथमा बाल–कलाकार सोहन थापाको अभिनय छ ।