कोरोना संक्रमणले सर्‍यो कांग्रेस केन्द्रीय समिति

काठमाडौं : नेताहरुलाई कोरोना भाइरस संक्रमण देखिएपछि नेपाली कांग्रेसको सोमबारका लागि बोलाइएको केन्द्रीय कार्यसमिति बैठक स्थगित भएको छ । ७ केन्द्रीय सदस्यसहित उनीहरुका लगभग ५ दर्जन सहयोगीलाई कोरोना संक्रमण देखिएपछि बैठक स्थगित भएको हो । स्थगित भएको बैठक आगामी २५ गतेका लागि बोलाइएको छ । 

पार्टी केन्द्रीय कार्यालयमा असोज १५ गते लिइएको पीसीआर परीक्षण गर्दा केन्द्रीय सदस्यहरु अर्जुननरसिंह केसी, गगन थापा जंगीलाल राय, कल्पना चौधरी र आमन्त्रित केन्द्रीय सदस्य शम्भुलाल श्रेष्ठलाई संक्रमण देखिएको थियो । काठमाडौं बाहिर पीसीआर परीक्षण गर्दा केन्द्रीय सदस्यहरु रमेश रिजाल र अजयकुमार चौरसियामा पनि संक्रमण देखिएको कांग्रेस केन्द्रीय कार्यालयले जनाएको छ । नेता र उनीहरुका सहयोगीलाई संक्रमण देखिएपछि कांग्रेस केन्द्रीय कार्यालय ५ दिन बन्द गर्ने र सोमबारका लागि बोलाइएको केन्द्रीय समिति बैठक २५ गतेसम्म साने निर्णय भएको मुख्यसचिव कृष्णप्रसाद पौडेलले जानकारी दिए । 

स्वास्थ्य मापदण्डलाई ध्यानमा राखी केन्द्रीय समिति बैठक स्थगित गरिएको पौडेलले बताए । २५ गते बोलाइएको बैठकमा केन्द्रीय कार्यसमितिका पदाधिकारी, केन्द्रीय सदस्यहरु तथा आमन्त्रित केन्द्रीय सदस्यहरुको उपस्थितिका लागि निर्देशानुसार अनुरोध गरिएको पौडेलले जानकारी दिए । 

स्वास्थ्य तथा जनसंख्या मन्त्रालयले तोकेको मापदण्ड अनुसार १७ गते संक्रमित भएका संक्रमित नेताहरु होम आइसोलेनसमा र उनीहरुको सम्पर्कमा रहेका अन्य नेताहरु होम क्वारेन्टाइनमा बसेका छन् । क्वारेन्टाइन र आइसोलेसनमा शनिबारदेखि बसेका नेताहरुको पाँच दिनपछि पुन स्वाब परिक्षण गर्दा संक्रमण नदेखिएमात्र कांग्रेस केन्द्रीय कार्यसमितिको बैठक बस्नेछ ।

असोज १५ गते कोरोनाको स्वाब दिएका नेताहरुको परीक्षणको रिपोर्ट शनिबार साँझ आउनुअघि नै नेताहरु केसी र थापा पार्टी सभापति शेरबहादुर देउवा, नेता रामचन्द्र पौडेलसहित पदाधिकारी र पूर्वपदाधिकारीको बैठकमा सहभागी भएका थिए । केसी र थापा उपस्थित बैठकमा सहभगी नेताहरु अहिले नीजि निवासमा क्वारेन्टाइन बनाएर बसेका छन् ।