आयस्रोत नखुलाई लगानी गर्न पाइने व्यवस्थाप्रति एमालेको आपत्ति

काठमाडौँ – प्रमुख प्रतिपक्षी नेकपा एमालेले आयस्रोत नखुलाई लगानी गर्न पाइने बजेटको व्यवस्थाप्रति आपत्ति जनाएको छ । आइतबार बसेको केन्द्रीय कमिटीको बैठकमा सदस्यहरूले सो व्यवस्थाप्रति आपत्ति जनाएका हुन् ।

प्रतिनिधि सभामा एमालेको विरोधका बीच बलजफ्ती बजेट पास गरेको र त्यसमा आयस्रोत नखुलाई लगानी गर्न पाइने प्रबन्ध गरिएको भन्दै एमालेले आपत्ति जनाएको हो । यस्तो व्यवस्था नेपालको संविधान र नेपालले गरेका सन्धि तथा अनुबन्धहरू विपरीत भएको एमालेको निष्कर्ष छ । ‘यसले कालो धनलाई प्रश्रय दिने र वास्तविक लगानीकर्तालाई निरुत्साहित गर्नेछ । यसमा हाम्रो आपत्ति छ र तत्काल फिर्ता लिन माग गरेका छौं,’ पार्टी प्रचार विभाग प्रमुख योगेश भट्टराईले भने ।