जनकपुरधामको एक कपडा पसलमा आगलागी

जनकपुरधाम- जनकपुरधामको एक कपडा पसलमा आगलागी भएको छ । आगलागीबाट करोडौं रुपैया क्षति भएको बताइएको छ । जनकपुरधाम उपमहानगरपालिका ९ स्थित रामानन्दचोकदेखि बाह्रबिघातर्फ अवस्थित महारानी बस्त्रालयमा भएको आगलागीमा करोडौ रुपैया बराबरको धनमाल जलेर नष्ट भएको धनुषा प्रहरीले जनाएको छ ।

स्थानीय उमाकान्त चौधरीले आफ्नै घरमा सञ्चालन रहेको सो महारानी वस्त्रालयमा आगलागी हुँदा करिव २ करोड बराबरको क्षति भएको जिल्ला प्रहरी कार्यालय धनुषाका प्रवक्ता प्रहरी नायव उपरिक्षक जितेन्द्र बस्नेतले जानकारी दिएका छन् ।

आगलागीमा पसल भित्र रहेका सम्पूर्ण कपडा, फर्निचर सामाग्री र नगद सहित जलेर नष्ट भएको कुरा पीडितको भनाइ  उदृत गर्दै प्रवक्ता बस्नेतले बताए ।

आगलागीको करीब एकडेढ घण्टापछि जनकपुरधाम उपमहानगरपालिकाको बारुण यन्त्र र प्रहरीको सहयोगमा आगो नियन्त्रणमा लिइएको छ । आगलागीको कारण खुल्न नसकेको र घटना सम्बन्धमा थप अनुसन्धान भईरहेको जिप्रका धनुषाले जनाएको छ ।