प्रदेश २ को मुख्यमन्त्री कार्यालयमा अख्तियारको छापा

कागजात नियन्त्रणमा लिँदै अख्तियारको टोली। तस्बिर : सुभाष कर्ण/इकागज

जनकपुरधाम - प्रदेश २ को मुख्यमन्त्री तथा मन्त्रिपरिषद् कार्यालयमा अख्तियार दुरुपयोग अनुसन्धान आयोगले छापा मारेको छ । बर्दिबासस्थित अख्तियार कार्यालयको सहकार्यमा केन्द्रबाट खटेको टोलीले मुख्यमन्त्री कार्यालयमा छापा मारेको हो ।

प्रदेश २ सरकारद्वारा संचालित ‘बेटी पढाउ, बेटी बचाउ’ कार्यक्रम अन्तर्गत  छात्राहरूलाई गरिएको साइकल वितरणमा साइकल वितरणमा अनियमितता भएको भन्दै अख्तियारले छापा मारेको बताएको छ ।

साइकल खरिद र वितरण कार्यमा अनियमितता भएको उजुरी परेपछि अख्तियारले त्यससम्बन्धी कागजात अनुसन्धानका लागि छापा मारेको बुझिएको छ ।

अख्तियारका प्रवक्ता नारायणप्रसाद रिसालले बर्दिबासबाट गएको टोलीले मुख्यमन्त्री कार्यालयमा  साइकल खरिदसम्बन्धी फाइल अनुसन्धानका लागि टोली त्यहाँ पठाइएको बताए । फाइलहरू नियन्त्रणमा लिई थप अनुसन्धानका लागि केन्द्रमा पठाउने उनले जानकारी दिए ।
 प्रदेश २ सरकारले २०७५ साल मंसिरबाट ‘बेटी पढाउ, बेटी बचाउ’ अभियान सुरु गरेको थियो । सो क्रममा १५ हजारभन्दा बढी साइकल ८ कक्षामा अध्ययनरत छात्रालाई वितरण गरिसकेको छ ।