मुस्कानलाई एसिड प्रहार गरी घाइते बनाएका युवक फेरि प्रक्राउ

वीरगञ्‍ज- वीरगञ्‍जकी मुस्कान खातुनलाई एसिड प्रहार गरी घाइते बनाएका युवकलाई प्रहरीले फेरि पक्राउ गरेको छ । वीरगञ्ज महानगरपालिका-२ छपकैया बस्‍ने १९ वर्षीय समशाद मियाँलाई प्रहरीले फेरि पक्राउ गरेको हो ।

दुई वर्ष पहिले २०७६ साल भदौ २० गते वीरगञ्ज-४ गणेशमान चोकमा तत्कालीन १५ वर्षीया मुस्कान खातुनलाई सम्साद र  मजिद आलमले एसिड प्रहार गरेका थिए । घटनालगतै पक्राउ परेका सम्साद र मजिदविरूद्ध ज्यान मार्ने उद्योग तथा तेजाब प्रहार गरी अनुहार कुरुप पार्नेसम्बन्धी कसूरमा अनुसन्धान तथा अभियोजन भई पर्सा जिल्ला अदालतको आदेशले दुवै जनालाई तत्काल पुर्पक्षको लागि बालसुधार गृह पठाइएको थियो । तर कोभिड-१९ को पहिलो लहरको संक्रमणका बेला २०७६ साल चैत ११ गतेको अदालतकै आदेश अनुसार चैत १२ गते सम्सादलाइ उनको  आमाको जिम्मा लगाएर घर पठाइएको थियो ।

त्यसबेला उनलाई २०७७ बैशाख १४ गते पुन बाल सुधार गृहमा ल्याएर जिम्मा लगाउन अदालतले आदेश दिएको थियो । तर सम्साद २०७७ साल बैशाख  १४ गते बालसुधार गृहमा हाजिर नभइ आफ्‍नै घरमा बस्दै आएका थिए । यहीबीच २०७७ साल फागुन २६ गते पर्सा जिल्ला अदालतले सम्सादविरुद्ध बाँकी कैद ५ महिना १६ दिन पूनः बालसुधार गृहमा राखी भुक्तान गर्ने गरी १ वर्ष कैद सजाय तोकेको थियो । तर फैसला कार्यान्वयन गर्ने सिलसिलामा सम्साद फरार भएका थिए । हाल उनलाई पक्राउ गरिएको पर्साका प्रहरी नायब उपरीक्षक ओम प्रकाश खनालले जानकारी दिए ।