कांग्रेस अधिवेशन : काठमाडौँ महानगरमा नेतृत्व छान्‍न मतदान हुँदै

काठमाडौँ – प्रमुख सत्तारुढ दल नेपाली कांग्रेसको काठमाडौँ महानगरपालिकामा नयाँ नेतृत्व चयनका लागि आज निर्वाचन हुँदैछ । बिहान नौ बजेबाट राष्ट्रिय सभागृहमा हुने निर्वाचनमा सभापतिमा प्रगतिमान रञ्जित र नीलकाजी शाक्यबीच प्रतिष्पर्धा हुँदैछ । रञ्जितलाई संस्थापन र नेता कृष्णप्रसाद सिटौला समूहको साथ छ भने शाक्यलाई नेता प्रकाशमान सिंह, गगन थापा र संस्थापन इतर समूहको साथ छ । 

रञ्जित प्यानलबाट उपसभापतिमा सुविरनाथ खनाल र भरत तन्डुकार, सचिवमा रमेश उप्रेती र सम्झना भट्टराई तथा सहसचिवमा इन्द्ररत्न बज्राचार्य र मुना सिटौला प्रतिष्पर्धामा उत्रिएका छन् । 

त्यस्तै संस्थापन इतर समूहका शाक्यको प्यानलबाट उपसभापतिमा सुशीला ढकाल र शान्तकुमार महर्जन, सचिवमा सुसन बैद्य र पुरुषोत्तम खकुरेल तथा सहसचिवमा विमला लामिछाने र अमृत मानन्धर प्रतिष्पर्धा गर्दैछन् । 

मुलुकको संघीय राजधानी, कांग्रेसका सबैभन्दा धेरै क्रियाशील सदस्य भएको काठमाडौं महानगरमा विगत १० वर्षदेखि कांग्रेस नेतृत्वविहीन छ । पार्टी  सभापतिदेखि सबैजसो नेताहरुको बसोबास क्षेत्र भए पनि काठमाडौं महानगरमा १२ र १३ औँ अधिवेशन नै भएन । 

६५ वर्षीय शाक्य काठमाडौं महानगरपालिका–२५ का वडाध्यक्ष समेत हुन् । 

काठमाडौं महानगरपालिकामा कांग्रेसका मात्रै २० हजारभन्दा धेरै क्रियाशील सदस्य छन् । ३२ वडा रहेको काठमाडौं महानगर अधिवेशनमा ती वडाबाट चुनिएका क्षेत्रीय प्रतिनिधि महानगर अधिवेशनका मतदाता हुन् । महानगर अधिवेशनका करिब १५ सय मतदाता छन् ।

संस्थापन समूहका सभापति उम्मेदवार ५१ वर्षीय रञ्जित सामाजिक सेवामा समर्पित काठमाडौंका नयाँ पुस्तामाझ लोकप्रिय नेता हुन् । नेविसंघबाट राजनीतिमा लागेका उनी तरुण दलको महानगर सभापति भए । उनी काठमाडौं–४ को क्षेत्रीय सचिव हुँदै जिल्ला कार्यसमिति सदस्य भएर समेत काम गरे । हाल उनी केन्द्रीय संगठन विभागको सदस्य छन् ।

संस्थापन इतर पक्षको उम्मेदवार ६५ वर्षे शाक्य काठमाडौं महानगरपालिका-२५ का निर्वाचित वडाध्यक्ष हुन् । संस्थापन नेताहरु गणेशमान सिंह, बीपी कोइराला लगायतको समीप्यमा कांग्रेसको राजनीति थालेका उनी विद्यार्थी, तरुण हुँदै पार्टी राजनीतिमा आएका हुन् । उनी तरुण दलका संस्थापक केन्द्रीय सदस्य समेत हुन् ।