ओलीको उपस्थितिमा नेकपा स्थायी समिति बैठक सुरु

फाइल तस्वीर

काठमाडौं : नेकपा स्थायी समिति बैठक सुरु भएको छ । बैठकमा प्रधानमन्त्रीसमेत रहेका अध्यक्ष केपी शर्मा ओली पनि सहभागी भएकाे नेकपा स्थायी समिति सदस्य लीलामणि पोखरेलले जानकारी दिए । 

यसअघि प्रधानमन्त्री ओली सहभागी नभएपछि अर्का अध्यक्ष पुष्पकमल दाहालले केही बेर अनौपचारिक बैठक राखेर ओलीलाई दोस्रो पटक भेट्न बालुवाटार पुगेका थिए । बिहान ओली दाहालबीच पहिलो पटक छलफल भएको थियो । 

प्रधानमन्त्री ओलीले मंगलबार संवैधानिक परिषद् सम्बन्धी अध्यादेश ल्याएपछि नेकपामा ओलीइतर समूह आक्रोशित भएको छ । लामो समयदेखि जारी विवाद समाधान गर्न नसकेर रुमल्लिरहेको नेकपाभित्रको विवाद सरकारको सिफारिसमा राष्ट्रपतिले मंगलबार अध्यादेश जारी गरेसँगै थप चर्किने देखिएको हो ।

यसअघि मंसिर २८ गते बसेको स्थायी कमिटी बैठकमा पार्टी केन्द्रीय सदस्य तथा पूर्वराजदूत कमानसिंह लामाको निधनको शोक प्रस्ताव पारित गरेर आजसम्मका लागि स्थगित भएको थियो ।