अंग्रेजी नयाँ वर्षमा अजय–आलिया भर्सेज अजय–आलिया

मुम्बई - भारत सरकारले महाराष्ट्रका हल खुल्ला गर्ने निर्णय गरेसँगै भारतमा फिल्म रिलिजका लागि तिथिमिति बुक गर्ने प्रतिस्पर्धा नै चलेको छ । यो प्रतिस्पर्धामा ठूला स्टारका फिल्म नै अगाडि छन् । यो तिथि ओगट्ने चक्कर यस्तो छ कि एकै कलाकारका दुई फिल्म बक्स अफिसमा भिड्ने भएका छन् । 

समाचारअनुसार आउँदो नयाँ वर्षको पहिलो हप्ता  अजय देवगन र आलिया भट्ट बक्स अफिसमा आ–आफ्नै फिल्मसँग प्रतिस्पर्धा गर्ने भएका छन् । ‘बाहुबली’ निर्देशक एसएस राजामौलीको ‘आरआरआर’ र सञ्जयलीला भन्सालीको ‘गंगुबाई कठैयावाडी’ एक दिनको अन्तरालमा रिलिज हुने भएपछि यी दुवै कलाकार बक्स अफिसमा आफ्नै फिल्मसँग प्रतिस्पर्धा गर्न बाध्य भएका हुन् । 

‘गंगुबाई कठैयावाडी’ आउँदो जनवरीको ६ तारिखमा रिलिज हुँदैछ भने ‘आरआरआर’ जनवरीमा ७ मा । दुवै फिल्ममा अजय देवगन र आलिया भट्ट मुख्य भूमिकामा छन् । 

‘आरआरआर’लाई भारतको अहिलेसम्मकै महंगो फिल्म मानिएको छ भने ‘गंगुबाई कठैयावाडी’लाई पनि सम्भावित हिट फिल्म सूचीमा राखिएको छ । यो फिल्मको ट्रेलरले कीर्तिमानी दर्शक पाएको थियो । विभिन्न भाषामा रिलिज हुन लागेको ‘आरआरआर’को ओटिटी अधिकार नेटफ्लिक्स र जि फाइभले लिएका छन् ।