नेपाली क्रिकेट टिम मार्चमा ओमान जाने

काठमाडौं : अन्तराष्ट्रिय क्रिकेट परिषद (आइसीसी) ले क्रिकेट वल्डकप लिग-२ को नयाँ खेल तालिका सार्वजनिक गरेको छ । विश्‍व क्रिकेट नियामक निकायले बुधबार जारी गरेको मिडिया रिलिजमा उल्लेख गरिएको तालिका अनुसार नेपालले ओमानमा आगामी मार्चमा त्रिदेशीय श्रृङ्खला खेल्नेछ । 

आयोजक ओमान, नेपाल र अमेरिका सहभागी हुने एकदिवशिय श्रृङ्खला मार्च १९ देखि २८ सम्म खेलिनेछ । लिग-२ को छैटौं सिरिजमा यी तीन टोलीले ६ एकदिवशिय खेल खेल्नेछन् । सन् २०२१ देखि २०२३ सम्म १४ वटा सिरिज अन्तर्गत ९६ एकदिवशीय खेलहरु खेलाइनेछ । लिग-२ को अंक तालिकामा १० खेलबाट १६ अंक बटुल्दै ओमान शिर्षस्थानमा रहेको छ भने अमेरिका १२ खेलबाट १२ अंक सहित दोस्रो स्थानमा रहेको छ । सात टिम सम्मिलत लिग-२ मा नेपाल चार खेल खेल्दै चार अंक बनाएर छैटौ स्थानमा छ । 

त्यस्तै, आइसीसीका अुसार नेपालले जुलाईमा हुने अर्को श्रृङ्खलामा घरेलु टोली स्कल्यान्ड र नामिवियाको सामना गर्नेछ । सन् २०२२ को फेबुअरीमा नेपालले पनि त्रिदेशिय श्रृङ्खलाको आयोजना गर्नेछ । जसमा नेपाल बाहेक, संयुक्त अरब इमिरेट्स (युएई) र पपुवा न्यूगिनीको सहभागिता रहनेछ । 

त्यसको पाँच महिनापछि नेपालले अमेरिकामा हुने अर्को श्रृङ्खलामा भाग लिनेछ । त्यस श्रृङ्खलामा आयोजक अमेरिका र नेपाल बाहेक ओमान सहभागी हुनेछन् । त्यस्तै, नेपाल सन् २०२२ को सेप्टेम्बरमा पपुवा न्यूगिनीको भ्रमणमा निस्कनेछ । नेपालले पुनः सन् २०२३ फेब्रुअरीमा अर्को श्रृङ्खलाको आयोजना गर्नेछ । त्यसमा नेपाल बाहेक, नामिबिया र स्कटल्यान्ड पाहुना टोलीका रूपमा सहभागी हुनेछन् ।