जलवायु परिवर्तनको मुद्दामा नेपाल-अस्ट्रेलिया एक हुनुपर्छः सापकोटा

काठमाडौं : सभामुख अग्‍निप्रसाद सापकोटाले जलवायु परिवर्तनको मुद्दामा एक भएर नयाँ सम्भावना खोज्नु पर्ने बताएका छन् । बिदाइ भेटका लागि सिंहदरवारस्थित आफ्नो कार्यकक्षमा आएका नेपालका लागि अस्ट्रेलियाका राजदूत पीटर बडसँगको कुराकानीमा सभामुख सापकोटाले नेपाल र अस्ट्रेलियाबीच ६० वर्ष लामो सुमधुर सम्बन्ध रहेको उल्लेख गर्दै राजदूत बडले आफ्नो कार्यकालमा सम्बन्धलाई थप प्रगाढ बनाउन योगदान गरेको बताए । 
 
सापकोटाले नेपाल र अस्ट्रेलिया दुवै देश कोभिड-१९ र जलवायु परिवर्तनको चुनौतिको सामना गरिरहेकाले नयाँ सम्भावना खोजिनु पर्ने बताए । हालै नेपाल र अस्ट्रेलियाबीच सुरु भएको सिधा हवाइ सेवा आगामी दिनमा समेत सुचारु रहने विश्वास सापकोटाले व्यक्त गरे।
 
नेपालमा रहेका भुटानी शरणार्थी व्यवस्थापन र भूकम्पका बेला गरेको सहयोगप्रति आभार व्यक्त गर्दै सापकोटाले अस्ट्रेलियाले नेपालमा गरिरहेको बहुआयामिक सहयोग जारी राख्‍नेमा आशावादी रहेको बताए । नेपालमा अस्ट्रेलियाले सुरु गरेको सामुदायिक वनको अवधारणा गृह जिल्ला सिन्धुपाल्चोकबाटै सुरु भएको स्मरण गर्दै आफूले सम्बन्धित मन्त्रालयको नेतृत्व गर्दा सो क्षेत्रलाई वन अध्ययन केन्द्रका रुपमा अघि बढाएको स्मरण गरे। 
 
राजदूत बडले जलवायु परिवर्तनको मुद्दामा नेपाल र अस्ट्रेलिया एकसाथ हुनुपर्ने बताए । बडले सभामुख सापकोटासँग विदाई भेट गर्दै जलवायु परिवर्तन र मानव अधिकारका क्षेत्रमा नेपाल–अस्ट्रेलियाबीचको सहकार्य जारी रहने बताए । ‘नेपाल र अस्ट्रेलिया दुबैले जलवायु सम्बन्धि समान संकटको सामना गरिरहेको छ,’ राजदूत बडले भने,‘नेपालमा हिमतालको चुनौति छ, हामी आगलागीको सामना गरिरहेका छौं।’