बनेपामा प्राविधिक प्रहरी टोलीसहित तालिम प्राप्त कुकुरद्वारा जाँच

बनेपा – दसैं, तिहार नजिकिँदै गर्दा प्रहरीले सुरक्षा व्यवस्थालाई थप सबल, सदृढ र प्रभावकारी बनाएको छ । प्रहरीले चाडपर्वको समयमा हुनसक्ने अपराध, अवैध चोरी–निकासी, लागूऔषध ओसारपसार तथा बिक्री–वितरण एवम् दुरुपयोग हुन सक्ने भएकाले बुधबारदेखि जिल्लाको विभिन्न स्थानमा सुरक्षा गतिविधि थप बढाएको हो ।

जिल्ला प्रहरी कार्यालय काभ्रेका प्रहरी नायव उपरीक्षक हरि खतिवडाका अनुसार जिल्लाका मुख्य राजमार्ग अरनिको र बीपी राजमार्गमा चल्ने सार्वजनिक तथा निजी सवारी साधनहरू र मानिसको बढी भीडभाड हुने संवेदनशील मानिएका स्थानहरू बनेपा र धुलिखेल नगर क्षेत्रभित्रका विभिन्न स्थानमा शान्तिसुरक्षाका कार्यलाई अगाडि बढाएको बताए ।

सो क्रममा प्रहरीले जिल्लास्थित सरकारी कार्यालयहरु, बैंक तथा वित्तीय संस्थालगायत तरकारी, बजार, डिपार्टमेन्टल स्टोर, धार्मिक तथा पर्यटकीयस्थल, जिल्लाको महत्वपूर्ण प्रतिष्ठान र लोकमार्ग भएर चल्ने सवारी साधनहरूमा लागूऔषध र विस्फोटक पदार्थ (पटका) ओसारपसार हुन सक्ने सम्भावनालाई दृष्टिगत गर्दै तालिम प्राप्त कुकुरसहितको प्राविधिक प्रहरी टोलीद्वारा जाँच गरिएको प्रहरी नायब उपरीक्षक खतिवडाले बताए । 

चेकजाँचका क्रममा विस्फोटक पदार्थ तथा कुनै पनि शंकास्पद गतिविधि फेला नपरेको र जिल्लाको शान्तिसुरक्षाको अवस्था सामान्य रहेको बताउँदै उनले सुरक्षा योजनाअन्तर्गत विभिन्न चरणमा भिन्नभिन्न खालका सुरक्षा जाँचसम्बन्धी कामलाई निरन्तरता दिइने जानकारी दिए ।

चाडपर्वको बेला सबैलाई बिदा हुने र सरकारी कार्यालयहरू बन्द हुने र मान्छेको आवतजावत पनि कम हुने भएकाले अपराधका काम बढ्ने सक्ने अवस्थालाई ध्यानमा राखेर सुरक्षा सतर्कता बढाएको उनको भनाइ छ । दसैं, तिहारको समयमा बीपी राजमार्ग हुँदै पूर्वका ताप्लेजुङ, पाँचथर, इलाम, झापासहित पूर्वीतराईका जिल्लाबासीहरू राजधानी काठमाडौंबाट बाहिरिने गरेका छन् ।