बस दुर्घटना सम्झँदै डोटीको जोरायलबासीले मनाए कालो दिन

सांकेतिक फोटो

डोटी – २० असोज ०७१ सालमा २९ जनाको ज्यान जाने गरी भएको बस दुर्घटनालाई सम्झिएर जोरायलबासीले कालोदिन मनाएका छन् । ०७१ सालको दसैं सकिएको भोलिपल्ट ना. ३ ख ५७०७ नम्बरको सुदूरपश्चिम यातायातको बस जोरायलबाट धनगढी जाने क्रममा उक्त ठाउँमा दुर्घटना भएको थियो ।

उक्त दुर्घटनामा परी २९ जना स्थानीयबासीको अकालमै मृत्यु भयो भने अन्य ६८ घाइते भएका थिए । जिल्लाको सबैभन्दा ठूलो दुर्घटनालाई सम्झिँदै यहाँका स्थानीयबासीले आजको दिनलाई कालो दिनका रूपमा मनाएको जोरायल–५ का स्थानीयबासी चित्रराज भट्टले बताए । ‘जिन्दगीमा बिर्सिनै नसकिने ठूलो घटना भयो, जो अहिले पनि हामीमाझ झलझली सम्झनामा आउँछ, सोही दुःखद् घटनालाई सम्झेर आजको दिन हामीले कालो दिनका रूपमा मनाएका छौं,’ उनले भने ।  

बसमा क्षमताभन्दा बढी यात्रु भएका कारण बसको पट्टा टुटेपछि उक्त दुर्घटना भएको जिल्ला ट्राफिक प्रहरी कार्यालय दिपायलको प्रतिवेदनमा उल्लेख छ । उक्त दुर्घटनाका आरोपी बसका चालक विष्णु साहु अहिले कारागारमा जेल सजाय भुक्तान गरिरहेका छन् । घटनामा मृत्यु भएकाको सम्झनामा यहाँका नागरिकले बुधबार साँझ २९ दीप बालेर श्रद्धाञ्जलिसभासमेत गरेका छन् ।