नेकपा एसको उपमहासचिवमा जगन्नाथ खतिवडासहित पदाधिकारी थपिए

काठमाडौँ – नेकपा एकीकृत समाजवादीले पार्टीको विभिन्न विभागका पदाधिकारी संख्याको टुंगो लगाएको छ । बिहीबार बसेको स्थायी कमिटी बैठकले पदाधिकारी टुंगो लगाएको हो । बैठकले पार्टीको अनुशासन आयोग, निर्वाचन आयोग र लेखा आयोगमा अध्यक्ष, उपाध्यक्ष र सचिव रहने गरी २५ सदस्य रहने साथै पार्टी पदाधिकारीमा चार जना नेतालाई मनोनयन गरेको छ ।

उपमहासचिवमा जगन्नाथ खतिवडा र सचिवहरूमा गरिमा शाह, जीवनराम श्रेष्ठ र भागवत विश्वासलाई मनोनयन गरेको छ । नेकपा एसले तीन पदाधिकारी मनोनय गरेपछि पदाधिकारी संख्या २१ पुगेको छ । स्थायी कमिटी बैठकले डा. बेदुराम भुषालको नेतृत्वमा रहने ५ सदस्य केन्द्रीय कार्यालय सदस्य र ११ सदस्यीय केन्द्रीय सचिवालय बनाउने निर्णय गरेको छ । स्थायी कमिटीको बैठक बस्न नसकेको अवस्थामा सचिवालयले गरेको निर्णयलाई आधिकारिकता दिने निर्णय पनि बैठकले गरेको प्रचार विभाग प्रमुखसमेत रहेका खतिवडाले बताए । बैठकले पार्टी संरचनाको विभिन्न निकायमा रहने पदाधिकारी र संख्यालाई पनि टुंगो लगाएको छ ।

७ असोजमा बसेको नेकपा एसको पहिलो केन्द्रीय कमिटीको बैठकले महासचिवमा डा.वेदुराम भुसालसहित केन्द्रीय पदाधिकारीहरू चयन गरेको थियो । माधव नेपाल अध्यक्ष रहेको पार्टीले ९ भदौमा निर्वाचन आयोगबाट दल दर्ताको प्रमाण पत्र पाएको थियो ।