अब बैंकमा क्रस-होल्डिङ लगानी गर्न प्रतिबन्ध

काठमाडौँ - बैंक तथा वित्तीय संस्थाहरूले एक आपसमा क्रस-होल्डिङ हुने गरी लगानी गर्न नपाइने भएको छ । नेपाल राष्ट्र बैंकले एकीकृत निर्देशन २०७७ संशोधन गर्दै प्रतिबन्ध लगाएको हो । 

पुरानो व्यवस्थाअनुसार क्रस-होल्डिङ गरी लगानी गरिरहेको संस्थापक सेयर बिक्री सम्बन्धमा बैंक तथा वित्तीय संस्थाहरूले आपसमा क्रस-होल्डिङ हुने गरी लगानी गरेको संस्थापक समूहको सेयर धितोपत्र विनिमय बजारमार्फत खरिद/बिक्री गर्नसक्ने व्यवस्था गरेको थियो । यसका लागि सर्तहरू पनि निर्धारण गरिएको थियो । 

बैंक तथा वित्तीय संस्थामा लगानीमा रहिरहेको संस्थापक समूहको सेयर नेपाल धितोपत्र विनिमय बजार मार्फत कारोबार गर्न सक्ने गरी छुट प्रदान गरिएको हुनुपर्ने उल्लेख थियो । त्यस्तै संस्थापक सेयर नामसारी वा बिक्री गर्दा संस्थापक सेयरधनीहरूको रुपमा रहिरहेका अन्य सदस्यहरुलाई प्राथमिकता दिनुपर्ने एकीकृत निर्देशन नं. १० को व्यवस्था यस प्रयोजनको लागि लागू नहुने पनि भनिएको थियो ।

धितोपत्र विनिमय बजार मार्फत सेयर खरिद गर्ने व्यक्ति/संस्था समेत संस्थापक समूहमा नै कायम रहने उल्लेख थियो । संस्थापक समूहको सेयर खरिदकर्ता कर्जा सूचना केन्द्र लि. को कालोसूचीमा समावेश नभएको हुनुपर्ने र प्रचलित कानुन तथा यस बैंकबाट जारी गरिएका निर्देशन बमोजिम संस्थापक सेयर/संस्थापक समूहको सेयर खरिद गर्न अयोग्य नभएको स्वःघोषणा सेयर खरिद गर्दाको अवस्थामा नै पेस गर्नु पर्ने सर्त थियो।