प्रधानमन्त्री निर्वाचितपछि दाहाललाई भेट्‍न पहिलो पटक खुमलटार जाँदै ओली

फाइल तस्बिर

काठमाडौं : नेकपाका कार्यकारी अध्यक्ष पुष्पकमल दाहाललाई फकाउन प्रधानमन्‍त्री केपी शर्मा ओली खुमलटार जाँदैछन् । सत्‍तारुढ नेकपामा विवादले उग्र रुप लिएपछि दाहाललाई फकाउन ओली दाहाल निवास खुमलटार जान लागेका हुन् । दाहालका प्रेस संयोजक विष्णु सापकोटाले प्रधानमन्त्री ओली केही बेरमा खुमलटार आउन लागेको नेकपाका नेता सुवास नेम्वाङले जानकारी गराएको बताए ।

ओली प्रधानमन्त्रीमा निर्वाचित भएपछि पहिलो पटक दाहाललाई भेट्‍न खुमलटार जान लागेका हुन् । दाहाललाई भेट्‍न ओली खुमलटार जान लागेकोलाई नेपाली राजनीतिलाई अर्थपूर्ण रुपमा हेरिएको छ । प्रधानमन्त्री खुमलटार जान लागेकाले सो क्षेत्रमा सुरक्षाकर्मी पहिलोको तुलनामा बढी खटिएका छन् ।

शुक्रबार दिउँसो दाहाल-माधवकुमार नेपाल समूहले जनवर्गीय संगठनको कार्यालय पेरिसडाँडामा प्रदेश १ का आफूनिकट जिल्ला अध्यक्ष, सचिव र केन्द्रीय सदस्यहरूको भेला गरेका थिए । उक्त भेलाले एकाधिकार र सर्वसत्तावादविरुद्ध डटेर लड्ने निष्कर्ष निकालेको थियो । भेलामा नेकपाका अध्यक्ष दाहालले आफूहरूले पार्टी अध्यक्ष एवं प्रधानमन्त्री केपी शर्मा ओलीलाई निषेध नभई नियन्त्रण गरेर जान खोजेको बताएका थिए । अध्यक्ष दाहाललले आफूहरूले ल्याएको प्रतिवेदनमा प्रवृत्तिगत कुरा मुख्य भएको बताएका थिए ।

भेला सकिएपछि शुक्रबार साँझ प्रधानमन्त्री ओलीलाई भेट्‍न दाहाल बालुवाटार गएका थिए ।