भारतविरुध्दको पहिलो टेस्ट अस्ट्रेलियाले जित्यो

काठमाडौं : पाहुना टोली भारतलाई आठ विकेटले पराजित गर्दै अस्ट्रेलियाले पहिलो टेस्ट आफ्नो कब्जामा पारेको छ । एडलैडमा सम्पन्‍न खेलमा घरेलु टिम अस्ट्रेलियाले ९० रनको लक्ष्य दुई विकेट गुमाउँदै पुरा गर्‍यो । योसँगै उसले चार टेस्ट श्रृङखलामा १-० को अग्रता बनायो । 

ओपनर जो बन्सले अविजित ५१ रन बनाएपछि अस्ट्रेलियाले दोस्रो इनिङमा ९३ रन बनायो । यसअघि भारतले नौ विकेटको क्षतिमा ३६ रन मात्र बनाउन सक्यो । टेस्ट क्रिकेटमा भारतले बनाएको यो अहिलेसम्मकै कम स्कोर हो । 

भारतका कुनै पनि ब्याट्सम्यानले दोहोरो अंक छुन सकेनन् । ओपनर मायांक अग्रवालले सर्वाधिक नौ रन बनाए भने हनुमा बिहारीले आठ रनको योगदान गरे । त्यस्तै, उमेशकुमार यादवले अविजित चार बनाउँदा मोहम्मद शामी भने एक रन बनाएको अवस्थामा चोट बोक्दै मैदान छाड्न बाध्य भए ।