पशुपति स्वच्छता अभियान पाँचौं हप्तामा

काठमाडौँ – स्वच्छ पशुपति अभियान पाँचौं हप्तामा प्रवेश गरेको छ । विश्वसम्पदा सूचीमा सूचिकृत पशुपतिनाथ परिसरलाई स्वच्छ र सफा बनाउने उद्देश्यले सुरु भएको यो अभियान शनिबार पाँचौं हप्तामा प्रवेश गरेको हो । 
 
पशुपति क्षेत्रलाई विश्वभर फैलिएका वैदिक सनातन धर्मावलम्बीको तीर्थस्थल एवं अन्य धर्मावलम्बीको गन्तव्यस्थलका रुपमा विकास गर्न स्वच्छ बनाउने अभियान असोजदेखि सुरु भएको थियो । शनिबारको सफाइ कार्यक्रममा पूर्वमुख्यसचिव लीलामणि पौडेलसहित बागमती सफाइ अभियानकर्मी जोडिएका छन् ।  
      
यस्तै अभियानकर्मी डा. राजु अधिकारी, चक्रबहादुर चन्द, चलचित्र कलाकार संघका अध्यक्ष रवीन्द्र खड्का, अधिकार सम्पन्न बागमती सभ्यता एकीकृत विकास समितिका अध्यक्ष उद्धवप्रसाद तिमल्सिनालगायत कलाकार तथा सफाइ अभियानकर्मी उपस्थिति थिए । पशुपतिनाथ परिसरलाई सफा र स्वच्छ राख्न हरेक शनिबार बिहान ८ बजेदेखि पशुपति सरसफाइ कार्यक्रम सञ्चालन हुँदै आएको छ । पाशुपत क्षेत्रलाई सफा राख्न सांकेतिक रूपमा सरसफाइ हुने गरेको स्वच्छ पशुपति अभियानका संयोेजक डा. श्याम खड्काले बताए । 
    
पूर्वमुख्यसचिव पौडेलले पशुपति स्वच्छ अभियानको निरन्तरताका लागि शुभकामना दिए । मन र भावनाले मात्र यस्तो कार्य गर्न सकिने हुँदा सम्पूर्ण अभियानकर्मीलाई उनले धन्यवाद दिए । अधिकार सम्पन्न बागमती समितिका अध्यक्ष तिमल्सिनाले बागमती सफा भएमात्र पशुपतिनाथको शोभा बढ्ने हुँदा बागमतीलाई ढलमुक्त गर्नुपर्ने र यसका लागि नीतिनियम बन्दै गरेको पनि जानकारी दिए ।