पाँचदलीय गठबन्धन सरकारले प्रतिगमनको नेतृत्व गरेको छ : ओली

काठमाडौँ – नेकपा एमालेका अध्यक्ष केपी शर्मा ओलीले पाँचदलीय गठबन्धनको सरकारले प्रतिगमनको नेतृत्व गरेको आरोप लगाएका छन् । शनिबारबाट सुरु एमालेको वडा अधिवेशनको भर्चुअल माध्यमबाट उद्घाटन गर्न पार्टी केन्द्रीय कार्यालयमा आयोजित कार्यक्रमलाई सम्बोधन गर्दै ओलीले यस्तो बताएका हुन् । 

‘प्रतिगामी शक्तिहरू अहिले गठबन्धनको नाममा आइरहेका छन्, यसमा कुनै भ्रम रहनु हुँदैन, द्विविधामा रहनु हुँदैन, यो तीन महिनामा देखिइसकेको छ, देशलाई अस्थिरतामा धकेल्ने, देशलाई अग्रममनमा जान नदिने’ ओलीले भने, ‘स्वेच्छाचारी, मनपरीतन्त्र देशमा लागू गर्ने अनुशासनहीनता अराजकता राज्यस्तरबाटै गर्ने यसप्रकारका क्रियाकलाप हामीले देखिरहेका छौं, यो प्रतिगमनतर्फको बाटो हो ।’

पूर्वप्रधानमन्त्रीसमेत रहेका ओलीले तीन महिनाको अवधिमै गठबन्धन सरकारको असली रूप देखिएको कटाक्ष गरे । ‘अहिलेको गठबन्धन सरकारले प्रतिगामी गतिविधिको नेतृत्व गरेको छ,’ ओलीले भने ।