एमाले केन्द्रीय कार्यालय तुलसीलाल स्मृति प्रतिष्ठान च्यासलमा सार्ने तयारी

थापाथलीस्थित एमालेकाे केन्द्रीय कार्यालय ।

काठमाडौँ – नेकपा एमालेको केन्द्रीय कार्यालय ललितपुर च्यासलस्थित तुलसीलाल स्मृति प्रतिष्ठानको भवनमा सार्ने तयारी भएको छ । प्रधानमन्त्रीबाट केपी ओली बाहिरिएपछि एमालेका हरेकजसो बैठक सोही भवनमा हुँदै आएकोमा अब आधिकारिक रूपमा पार्टी कार्यालय त्यहाँ सार्ने तयारी भएको हो ।  

एमालेले केन्द्रीय कार्यालबाट गर्दै आएका सबै काम त्यही भवनबाट गर्ने  महासचिव ईश्वर पोखरेलले जानकारी दिए । ‘नेकपा एमाले र तुलसीलाल स्मृति प्रतिष्ठानबीच आज महत्वपूर्ण समझदारी । अब केही समयपछिदेखि एमालेले केन्द्रीय कार्यालयबाट सम्पन्न गरिने सम्पूर्ण कामहरू यहींबाट हुनेछन्,’ महासचिव पोखरेलले फेसबुक पेजमा लेखेका छन् ।

एमालेले चैत ०७७ बाट थापाथलीमा पार्टी केन्द्रीय कार्यालय राखेको थियो । उक्त घर तत्कालीन प्रधानमन्त्रीसमेत रहेका ओलीका आर्थिक सल्लाहकार मोतीलाल दुगढले दिएको भन्दै आलोचना भएको थियो । तर एमाले नेताले भने थापाथलीमा पार्टी कार्यालय साँघुरो भएको भन्दै तुलसीलाल स्मृति प्रतिष्ठानमा कार्यालय सारेको जनाएका छन् । थापाथलीअघि धुम्बाराहीस्थित पासाङ ल्हामु स्मृति प्रतिष्ठानको भवनमा एमालेको केन्द्रीय कार्यालय थियो ।