कांग्रेसको आलोचना गर्दा एमालेले आफ्नै हालत नबिर्सियोस् : विश्वप्रकाश शर्मा

काठमाडौँ – नेपाली कांग्रेसका प्रवक्ता विश्वप्रकाश शर्माले एमाले अध्यक्ष केपी शर्मा ओलीलाई एमालेको हालत सम्झिन सुझाव दिएका छन् । ओलीले कांग्रेसमाथि आरोप लगाउँदा आफ्नो पार्टीको अवस्थाको हेक्का राख्न ओलीलाई सुझाव दिएका हुन् ।

एमालेको वडा अधिवेशन उद्घाटनका क्रममा शनिबार ओलीले आफूलाई लोकतान्त्रिक भन्ने कांग्रेस जस्तो पार्टीले पाँच वर्षसम्म महाधिवेशन गर्न नसकेको अभिव्यक्ति दिएका थिए । शर्माले ओलीको उक्त भनाइको खण्डन गर्दै सामाजिक सञ्जालमार्फत जवाफ फर्काएका हुन् ।

‘कांग्रेसले ५ वर्षभित्र महाधिवेशन गर्न सकेन भन्ने कमरेड केपी शर्मा ओलीको आलोचना स्वीकार्य, आलोचना गर्दा तथ्यको हेक्का नराख्नु भने लज्जास्पद,’ शर्माले लेखेका छन्, ‘कांग्रेसको २०७२ फागुनमा महाधिवेशन हुनुभन्दा २० महिनाअघि एमालेको २०७१ असारमा भएको थियो महाधिवेशन ।’ ओलीले कांग्रेसलाई एक औंला तेर्स्र्याउँदा बाँकी औंला ओलीतिरै तेर्सिएको शर्माले टिप्पणी गरेका छन् ।