‘सत्यम्’को कार्यशालामा राजेश हमाल, के हमाल बल्ल अभिनयमा गम्भीर हुन लागेका हुन् ?

काठमाडौँ -राजेश हमालसँग काम गर्ने निर्देशकको सदाबहादर गुनासो हुन्थ्यो, हमाल सेटमा बाहेक स्क्रिप्ट हेर्दा पनि हेर्दैनन् । करिअरको उतराद्र्धमा भने हमालले यो आलोचनालाई सकारात्मक रुपमा लिएका छन् । तिहारपछि सुटिङ हुन लागेको ‘सत्यम्’का लागि भने हमालले पसिना बगाइरहेका छन् । 

सामाजिक सञ्जालमा सार्वजनिक केही फोटोमा हमालले सहकर्मीसँग पसिना बगाइरहेको देख्न सकिन्छ । निर्माण टिमका अनुसार यतिबेला फिल्मको पोखराको नौडाँडास्थित देउराली रिसोर्टमा  कार्यशाला भइरहेको छ । हमाल सहकर्मी पल शाह, मालिका महत र मिलन सिजापतिसँग रिसार्टमा फिल्मका दृश्यको रिहर्सल गरिरहेका छन् । 

अनुपविक्रम शाहीको समेत महत्वपूर्ण भूमिका रहेको फिल्मको तिहारपछि सुटिङ हुने निर्माण टिमले बताएको छ । हमालको यो फिल्मलाई कमब्याक फिल्म मानिएको छ । ‘बागमती’ र ‘शकुन्तला’ जस्ता आश गरेका फिल्म नचलेपछि हमालले फिल्मबाट ब्रेक लिएका थिए । रेसम सापकोटाको लेखन तथा निर्माण रहेको फिल्मलाई शंकर कार्कीले निर्देशन गर्दैछन् । यो फिल्मको बजेट ३ करोड बताइएको छ ।