बागमतीका नवनियुक्त मुख्यमन्त्रीसहित मन्त्रीहरूद्वारा पदभार ग्रहण

हेटौंडा – बागमती प्रदेशका नवनियुक्त मुख्यमन्त्री राजेन्द्र पाण्डेले पदभार ग्रहण गरेका छन् । बिहीबार दिउँसो मुख्यमन्त्रीमा नियुक्त उनलाई प्रदेश प्रमुख यादवचन्द्र शर्माले केही बेरअघि पद तथा गोपनियताको शपथ ग्रहण गराएका थिए ।   

प्रदेश प्रमुख शर्माले मन्त्रिमण्डल विस्तार नभएसम्मका लागि मुख्यमन्त्री पाण्डेलाई नै आर्थिक मामिला तथा योजना मन्त्रालयलगायत केही मन्त्रालयको कार्यभार सम्हाल्ने जिम्मेवारी तोकेका छन् । पाण्डेले मुख्यमन्त्रीसहित मन्त्रीविहीन मन्त्रालयकोसमेत पदभार ग्रहण गरेका हुन् ।  

मुख्यमन्त्री पाण्डले बिहीबार नै कृष्ण खनाललाई आन्तरिक मामिला तथा कानुन मन्त्रालय, कृष्णलाल भँडेललाई भौतिक पूर्वाधार विकास मन्त्रालय र कुमारी मोक्तानलाई सामाजिक विकास मन्त्रालयको जिम्मेवारी दिएका छन् । नवनियुक्त मन्त्रीहरूले पनि आफ्नो मन्त्रालयमा पुगी पदभार ग्रहण गरेका छन् ।