ओली प्रवृत्ति राष्ट्र र जनताका लागि घातक : दाहाल

चितवन - नेकपा माओवादी केन्द्रका अध्यक्ष पुष्पकमल दाहालले नेकपा एमालेका अध्यक्ष केपी ओली प्रवृत्तिलाई निरंकुश र प्रतिगमनकारी प्रवृत्तिको संज्ञा दिएका छन् ।

शुक्रबार चितवनमा आयोजित पार्टी कार्यक्रमलाई सम्बोधन गर्दै अध्यक्ष दाहालले ओली प्रवृत्तिलाई निरंकुश प्रतिगमनकारी प्रवृत्तिको संज्ञा दिएका हुन् । ओली प्रवृत्ति नेपाल राष्ट्र र नेपाली जनताका लागि घातक रहेको स्थापित भएको दाहालको भनाइ छ ।

तत्कालीन प्रधानमन्त्री ओली आफ्नै प्रवृत्तिका कारण बालुवाटारबाट बालकोट जानुपरेको तर्क गर्दै ओली बालुवाटारबाट बालकोट जानु भनेको ठूलो पराजय भएको दाहालले बताए । बालुवाटार छोड्ने क्रममा ओलीले शोक परेकोजस्तो नदेखाउनका लागि बाजा बजाएर नाच्दै गाउँदै बालकोट गएको उनले आरोप लगाए । उनले ओली प्रवृत्तिलाई मलामी जाँदा हास्ने प्रवृत्ति भएकोसमेत तर्क गरे ।

‘ओली प्रवृत्ति भनेको एउटा निरंकुश, एकाधिकार, प्रतिगमनकारी प्रवृत्ति हो, नेपाल राष्ट्र र नेपाली जनताको निम्ति घातक प्रवृत्ति हो भन्ने कुरा स्थापित भइसकेको छ,’ दाहालले कटाक्ष गरे ।